Нийслэлийн Засаг дарга бөгөөд Улаанбаатар хотын захирагч С.Батболд өнгөрөгч амралтын өдрүүдэд Сонгинохайрхан дүүргийн 7, 9, 24, 25 дугаар хороонд ажиллаж иргэдтэй уулзсан. Энэ үеэрээ тус дүүрэгт үйл ажиллагаа явуулдаг “Ган хийц” ХК-ийн үйл ажиллагаатай танилцлаа. “Ган хийц” ХК нь үйл ажиллагаагаа эхлээд 32 жил болж байгаа бөгөөд энэ хугацаанд нийслэл болон хөдөө орон нутагт 250 гаруй барилга байгууламжийн ажлыг хийж гүйцэтгэсэн байна.
Компанийн зүгээс нийслэлийн агаарын бохирдлыг бууруулахаар дулааны алдагдалгүй барилгын материал, галд тэсвэртэй хөөсөнцөр хавтан, түлшний хэмнэлттэй, утаа багасгах европ стандартын “Бокра” яндангийн төхөөрөмж, “Ган хийц” бүрэн шаталттай зуух үйлдвэрлэн зах зээлд нийлүүлэх зорилгоор ажиллаж байгаагаа ерөнхий захирал М.Даваасүрэн хотын удирдлагуудад танилцууллаа гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.
