Өсвөрийн шатарчдын Ази тивийн аварга шалгаруулах тэмцээн Тайландын Чанмай хотноо болсон. Монголын багийн тамирчин зургаан настай Мягмаржавын Ялгуун охин рапид төрөлд алтан медаль, блиц төрөлд мөнгөн медаль хүртжээ. Тэмцээнд шар тивийн 26 орны 600 орчим өсвөрийн шатарчид оюун ухаанаа сорьсон. Өсвөрийн шатарчин М.Ялгуун охин нь Ховд аймгийн Алтай сумынх. Охин өмнө нь Боловсрол Соёл Шинжлэх Ухаан Соёлын яамны сайдын нэрэмжит 2018 оны өсвөрийн шатарчдын улсын аварга шалгаруулах тэмцээний зургаа хүртэлх насны охидын ангилалд есөн өргөөс найм хожин түрүүлснээр Монгол Улсын аваргын алтан медалийг Ховд аймагтаа 17 жилийн дараа авч иржээ.
