Увс аймгийн Улаангом сумын хоёрдугаар багийн малчин Б.Түмэнжаргалын хотонд ихэр ботго төржээ. Энэхүү ховор тохиолдол нь олон жилийн өнө авч ирдэг хэмээн нутгийн иргэд бэлгэшээж байгаа аж. Тиймээс Б.Түмэнжаргалын гэр бүлд сумын удирдлагууд болон ах дүүс нь хүндэтгэл үзүүлсэн байна.
Одоогоос сарын өмнө буюу гуравдугаар сарын 4-нд Дорнод аймгийн Баянтүмэн сумын Жаргалант багийн Улсын сайн малчин Х.Мөнхболдын “Ембүү мөнгөн” ингэнээс ихэр цагаан ботго төрсөн байдаг. Ингэ ихэрлэхийг эрт дээр үеэс монголчууд сайн цагийн эхлэл хэмээн бэлгэдэж ирсэн түүхтэй.
Иймд төрт ёсны уламжлал, монгол түмний заншил үйлийг хүндэтгэн дагаж, Монгол Улсын Ерөнхий сайдад ихэр цагаан ботгоны зургийг гардуулжээ. Дашрамд сонирхуулахад, Дорнод аймагт 1974 оны хоёрдугаар сард Цагаан-Овоо сумын малчин Б.Цэвээндоржийн тэмээний суурьт улаагчин ингэнээс ихэр ботго төрж байсан түүхтэй.