Японы мэргэжлийн сүмо бөхийн гуравдугаар сарын тэмцээн маргааш (2018.03.11) Осака хотод эхэлнэ. Осака хотод болох хаврын башё гуравдугаар сарын 11-25-ны өдрүүдэд болно. Бөхчүүд Осака хотод очиж бэлтгэлээ базааж байна. Энэ башёг ёкозүна Хакүхо М.Даваажаргал, ёкозүна Кисэносато нар өнжихөөр болсон. Их аварга Хакүхо анх удаагаа хоёр башё дараалан өнжиж байна. Ёкозүна Кисэносато мөн энэ сарын тэмцээнд бэртлийн улмаас барилдахгүй болсон гэдгээ өчигдөр мэдэгдсэн. Мэргэжлийн сүмогийн 72 дахь ёкозүна Кисэносато аварга болсноосоо хойш зургаан башё дараалан өнжлөө. Тэрбээр 2017 оны нэгдүгээр сарын башёд түрүүлж, ёкозүна цолд хүрснээс хойш өнөөг хүртэл нэг л башёд бүтэн барилдсан юм. Ийнхүү хоёр аварга башёд барилдахгүй болсон ч ёкозүна Какүрюү М.Ананд, озэки Гоэйдо, Такаясү нарын өндөр цолтой бөхчүүд барилдана. Манай бөхчүүдээс дээд зиндаанд Ичиножёо А.Ичинноров, Тамаваши Б.Мөнх-Оргил, Араваши Э.Дөлгөөн, Чиёошома Г.Мөнхсайхан нар барилдах юм.
Өнгөрөгч нэгдүгээр сарын башёд 10 даваа авсан Ичиножёо А.Ичинноров комүсүби цолтой барилдаж байгаа бол тавин хувийн амжилтаа үзүүлж чадаагүй Тамаваши Б.Мөнх-Оргил маэгашира 1-с барилдана. Жюүрёод Тэрүнофүжи Г.Ган-Эрдэнэ, Таканоива А.Баасандорж, Кёкүшихо Т.Эрдэнэбаатар, Азүмарюү С.Тодбилэг, Сэро А.Өнөболд, Даишохо Ч.Шижирбаяр, Миторюү Б.Төрболд, Таканова А.Баасандорж нар барилдана. Таканоива А.Баасандорж өнгөрсөн пүрэв гаригт /2018.03.01/ Киотод болсон нэгдсэн бэлтгэлд оролцжээ. Гэвч түүнийг маргаашийн башёд барилдуулах эсэх нь эцэслэн шийдэгдээгүй байна.