“Гэр хороолол хөдөлгөөн”-өөс Нийслэлийн Засаг дарга бөгөөд Улаанбаатар хотын захирагч С.Батболдод шаардлага хүргүүллээ.
Гэр хорооллын иргэдийн гуравдугаар чуулган өнөөдөр 09.00 цагаас Соёлын төв өргөөнд эхэлж, иргэдийн өмнө тулгамдсан асуудлыг хэлэлцэж байна.Мөн Сүхбаатарын талбайд “Эсэргүүцэж байна” жагсаалыг зохион байгуулж буй бөгөөд найман зүйл бүхий шаардлагыг хотын даргад хүргүүлж байгаа аж. Шаардлагад:
Газрын эздэд бизнес хийх боломж олгох тухай
Нийслэлд 216 мянган айл гэр хороололд амьдарч байна. Харамсалтай нь гэр хорооллын дахин төлөвлөлтийн ажлыг зогсоож, иргэдийг хохироож байна. Газрын эзэд газраа барьцаалж зээл авах эрхтэй болж, хашаандаа бизнес хийх боломж олгохыг шаардаж байна. Гэр хорооллын иргэд 2018.03.09-ний өдрийн чуулганаараа энэхүү асуудлыг хэлэлцэж Нийслэлийн Засаг бөгөөд Улаанбаатар хотын захирагч С.Батболдод дараах шаардлагыг хүргүүлэхээр шийдлээ. Үүнд:
“1.Нийслэлийн иргэдийн хурлын тэргүүлэгчдийн 2016/06/10-ны өдрийн 120 дугаар тогтоолоор баталсан “Гэр хорооллын дахин төлөвлөлтийн орон сууцны барилгын санхүүжилтийг зарцуулах журмыг хэрэгжүүлэх.
2.Нийслэлийн иргэдийн төлөөлөгчдийн хурлын 2016/10/28-ны өдрийн 4/09 дугаартай тогтоолоор хасагдсан 40 тэрбум төгрөгийг нийслэлийн төсөвт эргүүлэн тусгах.
3.2017/06/16-ны өдрийн Засаг даргын захирамжаар баталсан “Орон сууцны ипотекийн зээлийн урьдчилгаа төлбөрийн санхүүжилт” олгох журам буюу гэр хорооллын иргэдийн газрыг орон сууцны зээлийн 30 хувийн урьдчилгаанд тооцож, газрын үнэ цэнийг унагаж байгаа ажлаа зогсоо.
4.Гэр хорооллын иргэдэд газраа барьцаалж хөрөнгө босгох, санхүүгийн бүтээгдэхүүн гаргах хөтөлбөрийг үргэлжлүүлэх. Монгол Улсын Засгийн газрын 252 дугаар тогтоолоор баталсан “Сайн хашаа” хөтөлбөрийг үргэлжлүүлэх.
5.Хотын захиргааг “Нүхт” –д шилжүүлэхээр бэлтгэж байгаа шийдвэрийн төслийг цуцлах, хийгдэж байгаа ажлын зураг төсөл, дэд бүтцийн хөрөнгө оруулалтыг гэр хороололд зарцуулах, Хотын захиргааны шинэ цогцолборыг “Ханын материал”-д шилжүүлэхтэй холбогдон гарсан захирамжуудыг үргэлжлүүлэх.
6.Нийслэлийн иргэдийн хурлын тэргүүлэгчдийн 2016/05/06-ны 86 дугаар тогтоолоор баталсан “Дулаан техникийн шинэчлэлийн үйл ажиллагааны журам”-ын дагуу хуучин орон сууцыг дулаалах үйл ажиллагааг үргэлжлүүлэх.
7.Нийслэлийн иргэдийн төлөөлөгчдийн хурлын 2014/05/26 ны өдрийн 17/17 тогтоол, Нийслэлийн Засаг даргын А/460 дугаар тогтоолд заасан Нийслэлийн орон сууцны хөтөлбөр, амжилттай явж байгаа иргэдийн бүлэг болох, жишээлбэл “Нарлаг буянт ухаа”, “Газрын эзэн Баянзүрх” зэрэг иргэдийн оролцоотойгоор газар шинэчлэн зохион байгуулах ажлыг үргэлжлүүлэх.
8.2012 оноос өмнө газрын эздэд хямд үнэ тулган газрыг нь худалдан авч, цааш нь өндөр үнээр дамлан бизнес хийдэг байсан хуучин ажлаа одоогийн удирдлагууд сэргээлээ. Эрин зууны энэ луйвраа зогсоохыг тус тус шаардаж байна” гэжээ.