Гэр ахуйн тавилгын алдарт “IKEA” компанийн үүсгэн байгуулагч Ингвар Кампрад өнгөрсөн бямба гарагт Швед дэх гэртээ нас баржээ. Тэрбээр 91 настай байсан юм. Энэ тухай тус компанийн хэвлэлийн албаны цахим хуудаст өчигдөр мэдээлжээ.
“Манай компанийн үүсгэн байгуулагч, хүндэт нөхөр И.Кампрадыг алдсандаа бид маш их харамсан гашуудаж байна. Бидэнд үлдээсэн түүний өв олон жилийн туршид биднийг шагшин гайхшируулж, олон хүнд зориулагдсан хамгийн сайн ахуйг бүтээх түүний алсын хараа, чин хүсэл эрмэлзэл нь биднийг удирдан чиглүүлж, бидэнд урам зориг хайрласаар байх болно” гэж IKEA компанийн ерөнхийлөгч, гүйцэтгэх захирал Йеспер Бродин мэдэгдсэн байна.
И.Кампрад 1926 онд Шведийн өмнөд нутагт орших Смоланд хотод төржээ. Тэрбээр 17 насандаа “IKEA” компанийг үүсгэн байгуулж, 1958 онд Смоланд хотод анхны дэлгүүрээ нээж байжээ. “IKEA” гэдэг нь Ingvar Kamprad Elmtaryd Agunnaryd гэсэн үгний товчлол бөгөөд эхний хоёр үг нь тус компанийг үүсгэн байгуулагчийн овог нэр аж. Харин дараагийн хоёр үг нь И.Кампрадын төрсөн газрын ферм болон сүмийн нэр аж.