Японы мэргэжлийн сумо бөхийн нэгдүгээр сарын буюу Хацү башёгийн 15 дахь өдрийн барилдаанд Гүрж бөх Маэгашира Точиношин, Эндог давснаар ганцаараа 14 даваа, 1 унаатай Макүүчи /Дээд зиндаа/-д түрүүлж, Японы Эзэн хааны цомыг хүртсэн Европ тивийн гурав дахь бөхөөр тодорлоо.
Өмнө нь Болгарын Озэки Котоошюү, Эстонийн Озэки Барүто нар Макүүчид түрүүлж, Японы Эзэн хааны цом хүртэж байсан юм. 2018 оны анхны башё буюу Хацү башёд түрүүлсэн “Касүгано” дэвжээний бөх Гүрж сумоч Леван Горгазе буюу Точиношиноос уламжлал ёсоор сурвалжлагч ярилцлага авлаа.
Тэрбээр “Би өөрийгөө түрүүлсэн гэдэгт одоо ч гэсэн итгэж чадахгүй л байна. Башёгийн 10 дахь өдрөөс л түрүүлэх боломж байгааг мэдэрсэн. Түрүү бөх болж багшийнхаа ачийг хариулсандаа маш их баярлаж байна. Намайг үргэлж дэмжиж байдаг бүх хүмүүст болон Гүржийн ард түмэн, ахан дүүстэй, эхнэр хүүхэддээ чин сэтгэлээсээ баярлалаа. Саяхан төрсөн охиндоо түрүү бөх болж сайхан бэлэг барилаа. Цаашид улам хичээж барилдах болно” хэмээн онцолсон юм.
Точиношины хувьд энэ жил 30 настай бөгөөд 12 жил сумо бөхөөр барилдаж байна. Мөн 2000 оноос хойш Маэгашира цолтой түрүүлж, Японы Эзэн хааны цом хүртсэн дөрөв дэх сумочоор Точиношин тодорлоо.
Харин дөрвөн өдөр дараалан унасан71 дэх Их аварга Какүрюү М.Ананд, сүүлийн өдөр Озэки Гоэйдог давж. 11 даваа 4 унаатай Хацү башёг өндөрлөв. Озэки Такаясү, Митакэүмиг давж 12 даваатай башёг дуусгав.
Тэрүнофүжи Г.Ган-Эрдэнэ энэ башёд 7 өдөр өнжөөд дахин барилдаж нэг ч даваа авч чадалгүй 8 унаатай башёг дуусгасан бөгөөд тэрбээр гэмтэлтэй байгаа төдийгүй сахарын өвчтэй болсон зэрэг нь энэ барилдаанд нөлөөлсөн болов уу.
Ичиножёо А.Ичинноровын хувьд 10 даваатай башёг амжилттай дуусгалаа. Тэрбээр Комүсүби цол цаашлаад Сэкиваке цолтон болох боломж байна. Араваши Э.Дөлгөөн энэ өдөр 8 дахь даваагаа авсан бол Тамаваши Б.Мөнх-Оргилын хувьд башёг 6 даваа, 9 унаатай өндөрлүүлэв.