Засгийн газар өнөөдөр хуралдаж Эрдэнэт үйлдвэр ХХК-ийн 49 хувийг төрийн мэдэлд авах шийдвэр гаргасан тухайгаа хэвлэлийн бага хурлаар мэдэгдлээ.
Энэ үеэр ХЗДХ-ийн сайд Ц.Нямдорж Дээд шүүхийн шийдвэртэй холбоотой асуудлаар сэтгүүлчдэд ингэж ярилаа. Тэрбээр “УИХ-ын тогтоол гараад жил болж байна. Өмнөх Засгийн газар УИХ-ын тогтоолын харилцан суутгалыг хэрэгжүүлэх арга хэмжээ огт аваагүй. Ийм арга хэмжээ аваагүй байхад улсын бүртгэлд төрийн өмч гэж бүртгэчихсэн юм билээ. Тэрэнтэй нь холбоотой гомдол нь явсаар байгаад Дээд шүүх дээр бүртгэ гэсэн шийдвэр гарсан. Шүүхийн шийдвэрийн дагуу тэр бүртгэл хийгдсэн. Өнөөдрийн гарч буй шийдвэрийн гол ялгаа нь Засгийн газар тооцоогоо хийгээд, харилцан суутгал хийгээд “Эрдэнэт үйлдвэр” ХХК-ийг төрийн мэдэлд авч байна. УИХ, ЗГ шийдвэрээ гаргалаа. Энэхүү шийдвэр хэрэгжинэ” гэв.