УИХ дахь Ардчилсан намын бүлгээс өнөөдөр татварын нэмэгдэлтэй холбоотой хуулиудыг цуцлах шаардлагатай хэмээн үзэж байгаагаа илэрхийлсэн саналаа Ерөнхий сайдад хүргүүллээ.
Дэлхийн эдийн засаг сэргэж уул уурхайн бүтээгдэхүүний гадаад зах зээлийн эргэлт нэмэгдэж, түүхий эдийн үнэ өсч буй. Эдийн засаг ийнхүү өсөх таатай боломж бүрдэж байхад Засгийн газар хэд хэдэн төрлийн татвар нэмлээ. Олон төрлийн татвар нэмснээр айл өрхүүд ядууралд нэрвэгдэж, аж ахуй нэгжийн үйл ажиллагаанд ирэх дарамт ихэсч гадаадын хөрөнгө оруулалтад саад учрахаар байгаа ба санхүү, эдийн засгийн үзүүлэлтүүд саарч, нийгмийн дундаж давхарга устаж аюул нүүрлэж байна.
Тооцоо судалгаагүй нэмсэн эдгээр татварын нэмэгдэл цаашлаад сүүдрийн эдийн засгийг бий болгохоор байгаа тул Засгийн газар дээрх нөхцөл байдалд дүгнэлт хийж татвар нэмсэн хуулиудаа УИХ-аар оруулж цуцлах шаардлагатай хэмээн уг албан тоотод дурджээ.