Үндэсний сагсанбөмбөгийн лигийн хамгийн баялаг түүхтэй Лос анжелос Лэйкэрс үеийн үед хүчирхэг байсан. Жэрри Вэст, Карийм Абдул Жаббар, Мэйжик Жонсон, Шакил Онил, Коби Брайнт тэргүүтэй домгууд Нуурын багт 16 удаагийн аварга гэх цолыг бэлэглэсэн юм.
Лос Анжелос Лэйкэрсийн дасгалжуулагч Лүк Уолтон Портланд Триал Блэйзерст хожигдсоны дараахь хэвлэлийн бага хурал дээр “Шүүгчид өдөр бүр өөр шүүлт, дүрмээр тоглох юм” гэж шүүмжилжээ. Тоглолтын төгсгөлд Лэйкэрс багийн довтлогч Кайл Кузмагийн хоёр гарыг эсрэг багийн тоглогч Зак Колллинс цохиод, биед нь контакт үүсгэсэн ч алдаа өгөөгүй, бид 4 оноо илүү болох боломжтой байсан гэж тэрбээр хэллээ. Мөн тэрбээр “Лонзо Бол бөмбөг татаж байхад өөрөөс нь гарсан гэж үзээд алдаатай шийдвэр гаргахад өнөөх нь зөрөөд гурван оноо болсон. Шүүгчид хэтэрхий олон алдаа гаргасан. Дандаа Лейкерст хохиролтой” гэв.
Мөн тэр үеэр Лэйкэрсийн төвийн тоглогч Андрью Богут солилцоо наймааны шуум залуу тоглогчдын зоригийг мохоож байгаа талаар ярьсан. Тэрбээр “Үгүй гэж худлаа хэлээд яахав, тэдэнд онцгүй санагдаж байгаа, гэхдээ иймэрхүү бизнесийн яриа хэлцэлийг өөрийнхөө тоглолтонд нөлөөлөх хэмжээнд хүлээж авах хэрэггүй гэж зөвлөж сууна. 20-той хүүхдүүд яаж ч тэр талаар бодохгүй байх билээ” гэв.
Б.АМАРТҮВШИН