ОХУ-ын Санкт-Петербург хотод “WORLD MASTERS” жүдо бөхийн тэмцээн энэ сарын 16-17-нд болохоор тов гарчээ. 200 мянган долларын шагналын сантай тус тэмцээнд IJF-ийн жин тус бүрийн чансааны тэргүүн 16 бөх оролцдог уламжлалтай. Энэхүү тэмцээн нь жүдогийн ертөнцийн хамгийн нэр хүндтэй тэмцээнүүдийн нэг юм. Тус тэмцээнд манай улсаас 8 алт, 5 мөнгө, 6 хүрэл медал хүртэж байсан түүхтэй. Анхны “Мастерс” тэмцээн 2010 онд Өмнөд Солонгосын Сувонд болж байв. Үүний дараа 2011 онд Азербайжаны Баку, 2012 онд Казахстаны Алматы, 2013 онд Оросын Тюмень, 2015 онд Мароккогийн Рабат, 2016 онд Мексикийн Гвадалахара “Мастерс”-ийг хүлээн авч байлаа.
Б.АМАРТҮВШИН