Нийслэлийн Налайх дүүрэгт “Гашгаас хамгаалах иж бүрэн сургууль” 2017 оны 10 дугаар сарын 25, 26-ны өдрүүдэд амжилттай зохион байгуулагдаж, дүнгээ гаргалаа.
Гамшгаас хамгаалах иж бүрэн сургууль дүүргийн Онцгой комисс, хороодын Засаг дарга нар болон гамшгаас хамгаалах орон нутгийн 11 алба, мэргэжлийн анги, 25 аж ахуйн нэгж, байгууллагын томилгоот бүрэлдэхүүний дунд астрономийн 48 цаг, оперативын 700 цагийн багтаамжтай 2 хэсэг, 9 үе шаттай явагдаж өндөрлөв.
Сургуулийн удирдагч Нийслэлийн Онцгой байдлын газрын орлогч дарга, хурандаа А.Дашням иж бүрэн сургуулийг 90,5 оноо буюу Онц сайн гэж үнэлсэн юм.
Түүнчлэн цаашид удирдлагын менежмент, цагийн байдалд шуурхай арга хэмжээ авах чадавхийг дээшлүүлэх, нэгж, удирдлага хоорондын харилцан ажиллагаа, уялдааг сайжруулах, техник хэрэгслийг нэмэгдүүлэх, иргэдэд сургалт сурталчилгаа явуулахад анхаарахыг зөвлөлөө.
Сургуулийн үеэр газар хөдлөлт, үер, мал амьтны гоц халдварт өвчин, уул уурхайн осол, гал түймрийн үеийн дадлага сургуулийг хийж гамшгаас хамгаалах мэдлэгээ дээшлүүлж ажиллав.
Мөн “Яаралтай цуглар” дохиогоор аюулгүй талбайд нүүн шилжих ажиллагаанд 1857 иргэн оролцсон бол нүүлгэн шилжүүлэлтийн ажиллагааг анх удаагаа Налайх дүүрэгт “Монде тур” аялал жуулчлалын баазыг түшиглэн 300 гаруй иргэдийг төвлөрүүлэн амжилттай зохион байгуулсан нь улсын хэмжээнд анхдагч, цаашид жишиг болгох үйл ажиллагаа болсныг нийслэлийн ОБГ-ын бүрэлдэхүүн онцолсон юм.
Сургуулийн төгсгөлд дүүргийн Онцгой комиссын гишүүд, албад мэргэжлийн ангийн дарга нарыг 4 багт хуваан удирдах бүрэлдэхүүний сорилын шалгуурыг явуулж, нийт 2,5 км зайд маршаар гүйлгэн утаат орчноос эрэн хайх, аврах, анхны тусламж үзүүлэх, гал унтраах гэсэн дөрвөн цэгт даалгавар гүйцэтгэсэн байна.
Сургуулийн хаалтын үйл ажиллагаанд гамшгаас хамгаалах иж бүрэн сургуульд амжилттай оролцсон байгууллага, иргэдийг шагнаж урамшуулсан юм. Иж бүрэн сургуульд Онцгой комиссын 21 гишүүн, 11 албад, 22 мэргэжлийн анги, 64 аж ахуйн нэгж байгууллагын давхардсан тоогоор 12548 гаруй ажилтан албан хаагч, 256 нэгж техник хэрэгсэл оролцлоо гэж нийслэлийн Онцгой байдлын газраас мэдээллээ.
