Сонирхогчийн боксийн Олимп, Дэлхийн аварга шалгаруулах тэмцээний мөнгөн медалт МУГТ Н.Төгсцогт мэргэжлийн боксын рингэн дэх ээлжит тулаанаа ирэх сарын 18-нд АНУ-ын Невада мужийн Лас Вегас хотод “Cosmopolitan” цогцолборт хийхээр боллоо.
МУГТ Н.Төгсцогт мэргэжлийн боксын рингенд найман тулаан хийсэн бөгөөд бүх өрсөлдөгчидөө техникийн илт дуугаар буюу хүнд цохилтоор ялаад байгаа.
Манай тамирчны өрсөлдөгч нь энэ удаа АНУ-ын шилдэг тамирчин Хавьер Аугустин Мартинес байх юм. Калифорниа мужийн Сакраменто хотноо төрсөн Хавьер Мартинес энэ жил 19 настай бөгөөд мэргэжлийн рингэнд 10 удаа тулалдаж ялагдал амсалгүй өнөөдрийг хүрсэн байна. Үүнээс зургаан тулааныг хугацаанаас өмнө буюу хүнд цохилтоор ялжээ. Мартинесын хувьд мэргэжлийн боксын Дэлхийн аварга, шилдэг тамирчин Флойд Мэйвезерийн багт харьяалагдаж бэлтгэл сургуулилтаа хийдэг аж.
Манай тамирчин Н.Төгсцогт өнөөдрийн байдлаар мэргэжлийн боксын 1480 тамирчнаас 25-д эрэмбэлэгдэж байгаа бөгөөд энэ удаагийн тулаанд ялсан тохиолдолд чансааны эхний 20 багтаж Дэлхийн аваргын бүсний төлөө тулалдахад нэг алхам ойртох юм.