Нэгдүгээр хорооллын 32-ын буудал, Хархорин захын хооронд явган хүний зам дагуу худалдаа эрхлэгчид, Баянгол дүүргийн 15 дугаар хорооны нутаг дэвсгэр болох 3,4 дүгээр хороололд гар дээрээс худалдаа наймаа эрхлэгчид өнөөдөр тэмцлийн хурц хэлбэрт шилжихээр болсон тухайгаа мэдэгдлээ. “Нийслэл хотод гар дээрээс худалдаа эрхлэгч 1000 гаруй иргэн байдаг бөгөөд тэднийг байнга хөөж тууж, торгууль, хураамж авдаг. Улсаас нэг ч төгрөг гуйгаагүй, өөрөө өөрсөддөө ажлын байр бий болгож , амьдралаа авч яваа иргэдийг шахаж хавчих нь хэвийн үзэгдэл болсон тул бид өөрсдийнхөө эрх ашгийн төлөө тэмцэхээр болсон. Бид 100 гаруй хүний ажлын байрын төлөө тэмцэж байна. Үүний төлөө би үхэж ч чадна” гэж С.Мишигээ ярьсан юм.
Тэд 32-ын буудлын урд байх хог бүхий 60х15 хэмжээтэй газарт шар хашаа татаж тэндээ жижиглэн худалдаа эрхлэх зөвшөөрөл дүүргийн удирдлагуудаасаа хүсэхэд албан ёсоор зөвшөөрсөн хариу өгөхгүй байгаа ажээ. Тиймээс жижиглэн худалдаа эрхлэгч 50 хүн маргаашнаас хуурай өлсгөлөн зарлахаар болсон гэнэ. Тэдний өлсгөлөн зарлахыг 500 гаруй худалдаачин дэмжиж байгаа бөгөөд хугацаагүй өлсгөлөн зарлана гэсэн юм.
Б.НАРАН