УИХ дахь АН-ын бүлгээс УИХ-ын дарга М.Энхболдод анхааруулга хүргүүлжээ. Уг бичигт дурдахдаа “Үндсэн хуулийн 43 дугаар зүйлийн 4 дэх хэсэг, УИХ-ын дэгийн тухай хуулийн 38 дугаар зүйлийн 38.1 болон 38.2 дахь хэсгүүдэд заасны дагуу Засгийн газрыг огцруулах эсэх талаар шийдвэрлэх эцсийн хугацаа 2017 оны 9 сарын 6-ны өдөр буюу өнөөдөр билээ хэмээн сануулаад “МАН-ын бүлгийн дарга Д.Хаянхярваа ээлжит бус чуулганаар хэлэлцэх асуудалтай холбоогүй асуудлаар завсарлага авахаар санал гаргасныг УИХ-ын дарга хууль зөрчин хүлээн авч ноцтой үйлдэл гаргалаа” хэмээн “донгоджээ”.
Түүнчлэн “Хуулийн хугацаандаа Засгийн газрыг огцруулах эсэх асуудлыг хэлэлцэж чадахгүйд хүрвэл Үндсэн хууль зөрчиж, Үндсэн хуулийн цэцэд маргаан үүсгэх үндэслэл болохоос гадна УИХ-ын даргад хариуцлага тооцох нөхцөл үүсч болзошгүй”-г уг бичигт сануулжээ.
