Хичээлийн шинэ жил эхэлсэнтэй холбогдуулан, Улаанбаатар хот руу ирэх иргэдийн болон тээврийн хэрэгслийн тоо эрс нэмэгдэж байна. Үүнтэй холбоотойгоор халаасны хулгайн гэмт хэрэг өмсөх хандлагатай байгаа тул Нийслэлийн цагдаагийн газрын Гэмт хэрэгтэй тэмцэх газрын Халаасны хулгайн гэмт хэрэгтэй тэмцэх хэлтсийн алба хаагчид хулгайн гэмт хэрэг удаа дараа үйлдсэн этгээдүүдийг илрүүлэн шалгаж байгаа аж.
Энэ оны эхний 7 сарын байдлаар улсын хэмжээнд хулгайн 5200 хэрэг гарсан. Үүний 65.6 хувь нь халаасны хулгайнх бөгөөд 97.6 хувь нь Улаанбаатар хотод үйлдэгджээ.
Мөн томоохон худалдааны төвүүд, тээврийн товчоо, зүүн баруун аймгууд руу зорчдог тээвэр үйлчилгээний төвүүдийн ачаалал ихсэж, зорчин явагсдын тоо эрс нэмэгдэж байна. Мөн Эрээн хотод их хэмжээний бэлэн мөнгө биедээ авч явж байсан Монгол улсын иргэн А-ийн 6000 юаныг мөн манай улсын иргэн Т хулгайлсан болохыг эрэн сурвалжилж тогтоон мөрдөн байцаалтын ажиллагааг үргэлжүүлж байгаа юм. Иргэд та бүхэн биедээ их хэмжээний бэлэн мөнгө авч явахаас татгалзаж, цахим банк, бэлэн мөнгөний машиныг хэрэглэж хэвшин хулгайн гэмт хэргээс урьдчилан сэргийлэхийг цагдаагийн байгууллагаас сэрэмжлүүлж байна. Тиймээс, олон нийтийн газар, автобусанд үйлчлүүлэхдээ сонор сэрэмжтэй байхыг анхааруулж байна.