Катар улсад одоохондоо ОХУ-ын туслалцаа хэрэггүй гэж тус услын Гадаад хэргийн сайд Мухаммед бен Абдель Рахман Аль Тани мэдэгдлээ. “ОХУ бидэнд зайлшгүй тохиололд туслалцаа үзүүлнэ гэдгээ амалж, санал тавьсан. Гэхдээ одоогоор тэр зайлшгүй тохиолдол нь болоогүй байна” гэж тэрээр хэлсэн байна. Тэрээр Арабын орнуудын тавьсан хориг одоогоор иргэдийнх нь амьдралд нөлөөлөөгүй байна гэжээ. “Бүгд яаж амьдарч байсан, тэрэн шигээ л амьдарч байна. Амьдрал үргэлжилж байна” гэж Аль Тани онцолсон байна.
Мухаммед бен Абдель Рахман Аль Тани энэ сарын 10-ны өдөр ОХУ-ын Гадаад хэргийн сайд С.Лавровтой уулзалт, хэлэлцээр хийсэн. С.Лавров энэ үеэр хямралыг шийдэхэд бүх талын туслалцаа үзүүлэхэд бэлэн байгаагаа түүнд илэрхийлсэн юм.
“Бүгд яаж амьдарч байсан, тэрэн шигээ л амьдарч байна. Амьдрал үргэлжилж байна” гэж Аль Тани онцолсон байна.
Катар улс хааны гэр бүлийн гишүүдээ суллуулахын тулд “Лалын улс” бүлэглэлд тэрбум ам.доллар төлсөн, мөн Иран улстай ойр харилцаатай гэдгээр шалтаглан Арабын хойгийн Саудын Араб, Египет, Бахрейн, Арабын нэгдсэн Эмират улсууд энэ сарын 5-ны өдрөөс эхлэн тус улсаас харилцаагаа таслах шийдвэр гаргасан бөгөөд энэ шийдвэрийг удалгүй Йемен, Ливи, Мальдив, Маврикий, Мавритани, Коморын арлууд аялдан дагалдсан билээ.