Шөнийн гудамжинд Австри Монголын хөгжмийн фестиваль болно

Бээжин дэх Австрийн элчин сайдын яамны Соёлын Форум энэ жил Гёте Хөгжмийн Танхим, Гёте Институт, Монгол Улсын Филармони, Жазз Клуб, ЖаззЛаб хөгжмийн агентлагтай хамтран “Австри-Монголын хөгжмийн фестивал”-ийг олон нийтэд нээлттэй зохион байгуулах гэж байна.

Фестивалийн хүрээнд энэ сарын 11-нд буюу ирэх ням гарагт Сөүлийн гудамжинд Австрийн нэрт хөгжимчин Майкл Эрианий жазз квартет, Монголын Жазз Трэйн хамтлаг нээлттэй тоглох ба мөн өдрөө UB Jazz Club-т чөлөөт тоглолт (Жэм сэйшн) толилуулахаар төлөвлөжээ. Дараа өдөр нь Австрийн удирдаач ноён Маттиас Флецбергер Монгол Улсын Филармонийг удирдан тоглуулах юм байна. Энэ үдэш Баянмонгол чуулга мөн уран бүтээлээ хүргэхийн зэрэгцээ Майкл Эрианий жазз квартет, Жазз Трэйн хамтлагууд ч хүрэлцэн ирэх аж.

Эдгээр арга хэмжээний дараа Австрийн хөгжимчид Хөгжим Бүжгийн Коллежийн монгол оюутнуудтай уулзалт зохион байгуулахаар төлөвлөсөн байна. Австри Монгол хоёр орон хөгжмийн салбарт нягт хамтын ажиллагаатай байдгийн нэг тод илрэл нь энэхүү хөгжмийн фестиваль юм.

Мөн энэ сарын 11-14-ний өдрүүдэд Австрийн бизнесийн төлөөлөгчид Монголд албан ёсны айлчлал хийнэ. Фестиваль болон бусад арга хэмжээний талаар ЖаззЛаб хөгжмийн агентлагийн 95597500 утсаар холбогдож мэдээлэл авах боломжтой.