122 хүн тээвэрлэж яваад сураггүй болсон Мьянмарын цэргийн нисэх онгоцны сэгийг олсон талаар тус улсын Зэвсэгт хүчнээс мэдэгджээ. Мьянмарын боомт хот Лаунглоны зүүн эргээс 35 км зайд цэргийн хөлөг онгоц хайгуул хийж байгаад хоёр том хүн, нэг хүүхдийн цогцос илрүүлсэн байна. Мөн сүйрсэн онгоцных байж болзошгүй залуурыг тэнгисийн уснаас олжээ.
Мьянмарын армийн албаны хүмүүсийн мэдэгдсэнээр Хятадад үйлдвэрлэсэн Y-8-200F тээврийн онгоц Мьянмарын өмнөд нутгийн Миейк хотоос Янгоны хооронд нислэг үйлдэж байгаад сураггүй болсон байна. Онгоц Миейкээс хөөрөөд 29 минутын дараа буюу лхагва гаригийн 13.35 цагт Давэй хотоос 30 км орчим зайд гэнэт холбоо тасарчээ. Онгоцонд 122 хүн, тэдний 108 нь зорчигч, 14 нь нисэх багийн гишүүд байсан байна.