Арт кино урлагийг монголчуудад таниулан, кино сонирхогчдын мэлмийг мялаасан олон сайхан бүтээлийг тольдох боломж олгодог “Алтан хальс” кино наадам 5 дахь жилдээ Улаанбаатар хотноо зохион байгуулагдах гэж байна. Алтан хальс холбооноос уламжлал болгон зохион байгуулдаг тус наадам энэ жилээс индепендент кино наадам болж буйгаараа онцлог аж. Индепендент кино нь арилжааны бус цэвэр урлагийн бүтээл болох зохиолч болон найруулагчийн онцлогийг илтгэсэн, онцгой шийдэл бүхий, уран бүтээлчийн хувийн дуу хоолой чухалчлан илэрсэн бүтээл байдгаараа ялгардаг байна. Энэ сарын 9-11-ний өдрүүдэд зохиогдох тус наадмын ерөнхий ивээн тэтгэгчээр Юнител группын Номадиа пикчерс ажиллаж байна.
Алтан хальс индепендент кино наадам (Altan Khalis Independent Film Festival )-ын дээд шагнал Golden Reel Award-ын төлөө 25 бүтээл өрсөлдөж буйн 10 нь Монгол кино ажээ. Энэ удаагийн AKIFF Хүүрнэлт кино, Хүүхэлдэйн кино, Баримтат кино, Эксперименталь кино гэсэн төрлөөр зохиогдон
Шилдэг монгол хүүрнэлт кино
Шилдэг монгол хүүхэлдэйн кино
Шилдэг монгол баримтат кино
Шилдэг монгол эксперименталь кино
Шилдэг гадаад хүүрнэлт кино
Шилдэг гадаад хүүхэлдэйн кино
Шилдэг гадаад баримтат кино
Шилдэг гадаад эксперименталь кино гэсэн төрлүүдээр шагнал хүртэнэ. Тус наадмаас шагнал хүртсэн уран бүтээлчид Америкийн томоохон кино наадмуудын нэг болох Афины кино наадмын ( Аcademy Award Qualifying Festival) сонголтын хороонд бүтээлээ илгээх эрхтэй болох юм.
Энэ жилийн AKIFF-ын хүндэт зочноор Германы кино найруулагч Фатих Акин уригдан оролцохын зэрэгцээ түүний найруулсан, монгол хүү Б.Анандын тоглосон “Чик” (Tschick) киноны Ази тив дэх нээлтийг хийх ажээ.
AKIFF наадмын шүүгчдээр ОХУ-ын Халимаг гаралтай кино найруулагч Элла Манжеева, Нийтлэлч Б.Баабар, МУИС-ын Утга зохиол, урлаг судлалын тэнхимийн профессор, доктор Ph.D Ч.Болдбаатар, ЮНЕСКО-гийн Монголын Үндэсний Комиссын Соёлын асуудал хариуцсан мэргэжилтэн М.Цэцэнбилэг, Юнител группын Номадиа Пикчерсийн продюсер, эвлүүлэгч М.Төгөлдөр нар ажиллана.
АKIFF наадмын үеэр найруулагч Фатих Акин, Элла Манжеева нар кино уран бүтээлчдэд зориулан мастер класс зохион байгуулна.