Монгол хүний оюун ухаан, хүч хөдөлмөрөөр бүтсэн “Мазаалай” нэрт анхны бага оврын хиймэл дагуулыг өнөөдөр АНУ-ын Флорида мужийн Кеннедийн сансрын төвөөс Монголын цагаар 05:50 цагт хөөргөлөө. Эл түүхэн өдрийг тохиолдуулан МУИС-ийн хамт олон өглөөний 05 цагт сургуулийнхаа өмнөх талбайд өнгө, өнгийн бөмбөлөг хөөргөсөн байна.
ЮНЕСКО болон Япон Улсын Засгийн газрын ивээл дор хэрэгжиж буй “Joint Global Multi-Nation Birds” төсөл нь сансарт гарцгүй улс орнуудыг дэмжин анхны хиймэл дагуулаа бүтээж тойрог замд оруулахад нь туслах олон улсын төсөл юм. Төслийн хүрээнд Монгол, Япон, Нигери, Гана, Бангладеш зэрэг олон улсын таван хиймэл дагуулыг анх удаа нэг зөөгч пуужингаар тойрог замд оруулж байгаа юм.
МУИС-ийн залуу эрдэмтэн судлаачдын бүтээсэн анхны бага оврын хиймэл дагуул нь 400 км өндрөөр дэлхийг тойрч, Шинжлэх ухааны болон технологийн хэд хэдэн шинэ туршилтыг хийх юм. Тодруулбал нисч буй орчныхоо агаарын нягт, цацраг идэвхийн байдлыг тодорхойлох юм байна. Улмаар хиймэл дагуулын байрлалыг оролцож буй орнуудын газрын станцын тусламжтайгаар тодорхойлж, сүлжээ зохион байгуулах, соронзон бүртгэгч болон хурдан камерын тусламжтайгаар пассив навигаци хийх бөгөөд 100 метрийн нарийвчлалтай зураг авч илгээх аж.
