Хятад улсын гаргасан “Нэг бүс, Нэг зам” санаачилгад оролцохоос түдгэлзэх шийдвэрийг Австралийн засгийн газар гаргажээ. Энэ тухай The Australian сонинд Хятадын Төрийн зөвлөлийн Ерөнхий сайд Ли Көцяны гуравдугаар сард Австралид хийсэн айлчлалын талаарх мэдээллээс иш татан бичсэн байна.
Мэдээлэлд дурдсанаар, Ли Көцяны айлчлалын үеэр “Нэг бүс, Нэг зам” санаачилгад Австрали улс нэгдэх тухай харилцан ойлголцлын санамж бичигт гарын үсэг зурна хэмээн Хятад улс найдаж байгааг Хятадын Гадаад хэргийн сайд Ван И Австралийн Гадаад хэргийн сайд Жули Бишоптой уулзахдаа илэрхийлжээ.
The Australian сонинд бичсэнийг үзвэл, засгийн газар болон үндэсний аюулгүй байдлын хорооны хурлын үеэр сайд нарын ихэнх нь эргэлзсэн байр суурьтай байсан аж. Бээжингийн санаачилгад Австрали улс нэгдэхийг хүсэхгүй байгаагийн гол шалтгаан нь санамж бичигт гарын үсэг зурснаар Австралид ямар үр өгөөжтэй гэдэг нь тодорхойгүй байсан явдал юм. Үүнээс үүдэн Ли Көцяны айлчлалын үеэр санамж бичигт гарын үсэг зурахгүй гэдгээ Австралийн засгийн газар Хятадын талд мэдэгдсэн байна.