Гэр хорооллын дахин төлөвлөлтөөс болж хохирсон иргэд АН-ын байрны урд тайван жагсаал хийж байна. Тэд Хотын дарга асан Э.Бат-Үүлээс хохирлоо нэхэмжилж, орон байраа буцааж авахыг шаардсан лоозон барьжээ. Жагсаал хийж буй иргэдийн дотор дахин төлөвлөлтөд хамрагдахаар хуучин байр болон газраа чөлөөлж өгсөн боловч шинэ байранд өнөөдрийг хүртэл орж чадаагүй иргэд байгаа аж.
Улмаар зарим иргэд таван жил шахам айлаар тэнүүчлэн амьдарч буйгаа дуулгалаа. Тиймээс энэ асуудалд Хотын дарга асан Э.Бат-Үүлийг хариуцлага хүлээж, хохирлыг нь барагдуулж өгөхийг шаардаж байгаа юм байна. Тэдний жагсаалыг цагдаа нар тараахыг шаардсан ч иргэд эсэргүүцлээ илэрхийлсээр байв. АН-ын Ерөнхий нарийн бичгийн дарга О.Магнай ирж хүмүүсийг зохицуулахыг оролдож байв.
Тэд “Та нар шинэ ордонд бид нар гудамжинд байна”, “Орох оронгүй гудамжинд таван жил амьдарлаа”, “Сургууль, цэцэрлэгийн насны хүүхдүүдийг харьяа бус гээд авдаггүй”, “Их Өргөө” ХХК Д.Арвин та гэрээний үүргээ биелүүл”, “Амьдралаа буцааж авмаар байна Бат-Үүл даргаа” зэрэг уриа барин жагсаж байлаа.
О.ӨНӨР