Ерөнхийлөгчийн ажилд дүн тавих “Ардын үг” зөвлөлдөх аяны дөрөв дэх хэсэг өнөөдөр эхэлж байна. Дөрөв дэх уулзалтаар “Ногоон хөгжил, баялаг бүтээгчдээ дэмжих чиглэлээр Төрийн тэргүүн өнгөрсөн хугацаанд хэрхэн ажилласныг санамсаргүй түүврээр сонгогдсон иргэд буюу “Ардын эксперт”-үүд дүгнэхээр боллоо. Ерөнхийлөгчийн хувьд мод тарих санаачлагыг эхлүүлж, хулгайн мод бэлтгэх, тээвэрлэхийг хориглох шийдвэр гаргасан. Мөн баялаг бүтээгчдээ дэмжих, байгаль орчноо хамгаалах чиглэлд олон санаачлага гаргасан байдаг. Энэ хүрээнд дэлгэрэнгүй, бодит мэдээллээр иргэдээ хангахаар Монголын медиа корпораци энэ долоо хоногийн турш ажиллах юм. Учир нь олон талын эх сурвалжаас, бодит мэдээлэл авсан иргэд Ерөнхийлөгчийн хийсэн ажилд илүү бодитой дүгнэлт хийх боломжтой болох билээ. Монголын медиа корпорациас санаачлан хэрэгжүүлж буй “Ардын үг” иргэдийн зөвлөлдөх аян Монгол Улсын Ерөнхийлөгч Ц.Элбэгдоржийн бүрэн эрхийн хугацаа дуусч байгаатай холбогдуулан түүний өнгөрсөн найман жилийн хугацаанд хийж хэрэгжүүлсэн ажил, санаачлагад иргэдээр дүн тавиулж буй юм.