Канад улсын Хатан хааны морьт цагдаагийн газрын төлөөлөгчид 2017-03-р сарын 06-07 ны өдрүүдэд Монгол улсын Цагдаагийн Ерөнхий газарт айлчиллаа. Айлчлалын хүрээнд Монгол улсын цагдаагийн алба хаагчдад “Гэмт хэрэг мөрдөн шалгах ур чадварыг дээшлүүлэх нь” сэдэвт сургалтыг хамтран зохион байгуулсан юм.
Уг сургалтанд Хууль сахиулахын их сургуулийн багш нарын төлөөллийг урилгаар хамруулж, Канад улсаас Тайланд Улсад суугаа Элчин сайдын яамны Хатан хааны морьт цагдаагийн газрын ажилтан Рэймонд Порте Канадын цагдаагийн байгууллагын тэргүүн туршлагаас хуваалцаж, сургалтад оролцсон алба хаагчдад сертификат гардуулах ёслолд Канад улсаас Монгол Улсад суугаа Элчин сайдын яамны төлөөлөгчид оролцжээ.
Мөн айлчлалын хүрээнд Канад Улсын Хатан хааны Морьт цагдаагийн газрын төлөөлөгчид шинээр үүсгэн байгуулагдсан Цагдаагийн Ерөнхий газрын Мэдээлэл нэгтгэн боловсруулан газрын Гэр бүлийн хүчирхийлэлтэй тэмцэх, урьдчилан сэргийлэх хэлтсийн удирдлага, алба хаагчидтай уулзан үйл ажиллагаатай нь танилцаж, гэр бүлийн болон хүйсийн тэгш бус байдалд суурилсан хүчирхийлэлтэй тэмцэх чиглэлээр Канадын цагдаагийн байгууллагын туршлагаас хуваалцаж санал солилцлоо.