нөөдөр ШУА-ийн Түүх, археологийн хүрээлэнгийн 2008-2010 оны хооронд Ховд аймгийн нутагт хэрэгжүүлсэн төслийн хүрээнд Манхан сумын Жаргалант хайрхан, Булган сумын Баян-Өндөр ба Чонот уулын хадны оршуулгуудаас олдсон “Алтайн ятга” тэргүүтэй 300 гаруй олдворыг дэлгэн үзүүллээ.
Энэхүү үзэсгэлэнг Үндэсний музейд гуравдугаар сарын 15 хүртэл үзэж сонирхож болох юм байна. Алтайн ятгын тухайд эх бие, царан дээр зургаан буга, янгир, таван нохой сийлснээс гадна “руни” бичгээр “яаялиг” буюу аялгуут, “Чүрэ” хэмээх эзний нэр зэргийг багтаасан нийт 64 тэмдэг бичээстэй байдаг байна.
Мөн ховор үзмэрүүдийн тоонд 1287 оны Юань улсын цаасан мөнгө орж байна. 28 см урт, 23.5 см өргөнтэй энэ мөнгийг модны холтос, ургамлын навч зэргийг хольж тусгай аргаар боловсруулсан цаасан дээр барласан энэ мөнгө нь 100 ширхэг зоостой тэнцэх үнэлгээтэй гэнэ.
Ховд аймгийн Булган сумын Чонот уулын хадны оршуулгаас олсон хавтага нь загасны хайрсаар хийгдсэн байсан гэнэ. Тэрхүү уутан дотор жижиг арьсан уут, сүлжэн болон сүлжээгүй сур, богийн шагай, ясан тээг зэрэг зүйлс байжээ.
