УИХ-ын хаврын ээлжит чуулганаар Үндсэн хуульд нэмэлт өөрчлөлт оруулах тухай хуулийн төслийг хэлэлцэх тов гарсан. Тэгвэл энэ асуудалд УИХ-ын дарга М.Энхболд байр сууриа илэрхийлжээ.
Тэрбээр “Үндсэн хуулийн өөрчлөлтийн асуудлыг ард олноосоо асууж байж шийднэ гэж манай нам хөтөлбөртөө тусгасан. Миний хувьд нэг нам дангаараа буюу олонхиороо шийдэж болохгүй гэсэн байр суурьтай байгаа. Гэхдээ ард түмнээсээ асуугаад цөөн тооны тодорхой асуудлуудаар өөрчлөлт оруулж болно. Тухайлбал Засгийн газрын асуудал байна. Засгийн газрын эрх мэдлийг илүү тодорхой болгох ёстой. Хотын асуудал байна. Суурин соёл иргэншлийн дэлхийн жишгийн дагуу аймгуудын төв, зарим томоохон сумдыг хот болгохоос өөр аргагүй” гэсэн байна.
Мөн тэрбээр “Төрийн албаны тухай хуулийг хаврын ээлжит чуулганаар хэлэлцэж өөрчилнө. Төрийн алба босго өндөртэй байхаас гадна төрийн албан хаагчдын ажиллах нөхцөл боломжийг сайн хангах, улс төрөөс ангид, хараат бус байх, улс төрийн сонгуулийн дараа бужигнадаг байдлыг халж, дархлааг нь сайжруулах ёстой. Мэдлэг чадвар, дадлага туршлагаараа шат дараалан дэвших мерит зарчмыг хатуу хуульчилж өгөх нь зөв гэж үзэж байна” гэжээ.