Ардчилсан нам өнөөдөр шинэ байранд нүүж орлоо. АН-ын шинэ дарга С.Эрдэнэ өөрийн эзэмшлийн “Шонхор тауэр”-ын нэрийг “Ардчиллын өргөө” болгон өөрчилж, намынхнаа орууллаа. Шинэ байрны нээлтийн арга хэмжээнд АН-ын удирдлагууд болон гишүүд дэмжигчид нь оролцов. Тус намын дарга С.Эрдэнэ нээлтийн үеэр хэлэхдээ “Ардчилсан намын шинэчлэлийн ажил үе шаттайгаар явж байна. Бид VII их хурлаа амжилттай зохион байгууллаа. Намын дүрмээ бүх гишүүдээрээ хэлэлцүүлж чадлаа. Мөн өнөөдөр шинэ байранд буурь сэлгэж байна. Энэ байраар маань намын гишүүд дэмжигчид өдөр бүр орж гарч, санал бодлоо уралдуулна гэдэгт итгэж байна” гэв. Ирэх хавраас шинэ байр барих ажилдаа орно гэдгийг ч энэ үеэр онцолсон. Ардчилсан намын хуучин ашиглаж байсан байрыг намын Сургалт, сурталчилгааны байр болгохоор шийдвэрлэсэн байна.
