ЭМ-ийн сайд А.Цогцэцэг Донорын тухай хуулийн шинэчилсэн найруулгыг өчигдөр Байнгын хорооны хуралдаан дээр танилцуулсан юм. Тэрбээр, “Энэ хууль нь 2000 онд анхлан батлагдаж 2012 онд нэмэлт өөрчлөлтүүд орсон. Хүмүүнлэг сэтгэлээр хүмүүс бусдын амь насыг аврахын тулд цус болон цусан бүтээгдэхүүнээ хандивлах доноруудын асуудлыг ярьж байгаа. Энэ хуулийн ач холбогдол бол зөвхөн эрхтэн биш эс суулгах асуудал юм. Үргүйдэлтэй холбоотойгоор эр, эм бэлгийн эсийг үр хөврөл бий болгож түүнийгээ суулгаж айл гэрийг аз жаргалтай болгож байна гэв.
Хуулийн шинэчилсэн найруулгын төслийн талаар гишүүд асуулт асууж, сайд хариулт өгсөн юм.
Д.Сарангэрэл: Энэ бол чухал хуулийн төсөл. Тиймээс дэмжиж байгаа. Донорын хууль гарснаар аутизмыг эмчлэх боломжтой болно гэж сайд хэллээ. Энэ тал дээр ямар дэвшилт гарах талаар хэлж өгөхгүй юу?
А.Цогцэцэг: Донорын хуулийг шинэчлэн найруулснаар хэд хэдэн ач холбогдолтой. Амьд донорыг хамгаалж байгаагаар эрхтэн дутуу хүмүүсийг хамгаалж байгаа нэг сайн тал байгаа. Дэлхийд эрхтэн шилжүүлэх мэс заслыг хэр хийж байгаагаар нь анагаах ухааных нь хөгжлийг тодорхойлж байдаг. Үүнд эрхтэн шилжүүлэн суулгах, ясны чөмөг суулгах асуудлуудыг шийдвэрлэж байгаагаараа онцлогтой. Тэгэхээр аутизмын өвчнийг энэ үүдэл эсээр шилжүүлэн суулгаснаараа эмчлэх олон улсын туршлага батлагдсан технологи байгаа. Тиймээс үүнийг хөгжүүлж ажиллах шаардлага байгаа.
О.ӨНӨР