БНХАУ-ын Шаньдун мужийн Жи Нань хотод 2017 оны нэгдүгээр сарын 14-17-ны өдрүүдэд явагдсан Өвлийн усан сэлэлтийн Дэлхийн цомын 6 дахь удаагийн тэмцээн боллоо. Энэхүү тэмцээнд нийт 16 орны 1000 гаруй тамирчид оролцжээ. Манай улсаас Монголын Өвлийн Усан сэлэлтийн холбооны тамирчин, спортын мастер Ш.Даваадорж оролцсон бөгөөд нийт 5 төрлөөс 2 алтан медаль, 2 мөнгөн медаль хүртсэн байна. Манай улсаас анх удаа уг тэмцээнд ганц тамирчинтай оролцож, өндөр амжилт гаргасныг тус тэмцээнийг зохион байгуулагчид болон бусад орны тамирчид онцолжээ.
Ш.Даваадорж өнгөрсөн жил зохиогдсон ОХУ-ын Владивосток хотноо болсон Өвлийн усан сэлэлтийн Дэлхийн Цомын аврага шалгаруулах тэмцээнээс нэг алтан медаль хүртэж байсан бол Украйн улсад гуравдугаар сард зохиогдсон тэмцээнээс 7 алтан медаль хүртэж Монголын усан сэлэлтийн спортод түүхэн амжилт гаргаж байсан юм.