БСШУС-ын сайд Ж.Батсуурь өнөөдөр Хүүхдийн нэрт зохиолч Д.Содномдоржийн нэрэмжит шагналыг Монгол Улсын Төрийн соёрхолт, СГЗ Ж.Дашдондог, МЗЭ-ийн Утга зохиолын төлөө шагналт, хүүхдийн зохиолч Ю.Санжаагончиг, МЗЭ-ийн шагналт Ш.Энхбаяр нарт гардуулав.
Монголын орчин үеийн хүүхдийн утга зохиолыг үндэслэгчдийн нэг Д.Содномдорж нь багачуудын дуулах дуртай “Жигмэд Тогмид хоёр” дууны шүлэг, “Норовын намтар” бэсрэг хошин найраглал, “Тахир тав, махир хоёр” бэсрэг найраглал, “Навсайдамба ба түүний нөхөд” зэрэг хүүхдүүдийн унших дуртай бүтээлийг туурвисан нэрт хүүхдийн зохиолч юм.
Тиймээс нэрт зохиолчийн дурсгалыг алдаршуулах, хүндэтгэх үүднээс “Монголын хүүхдийн зохиолчдын холбоо” түүний нэрэмжит шагнал бий болгон шилдэг бүтээл туурвисан зохиолчдод уламжлал болгон олгохоор болсон байна. Энэхүү шагналыг гурван жилд нэг удаа олгох юм.
Дашрамд дурдахад, “Монголын хүүхдийн зохиолчдын холбоо”-ны тэргүүн хүүхдийн зохиолч, театр судлаач, дэд профессор Н.Энхтайван нь хүүхдийн зохиолыг дагнан туурвиж, бүтээл нь гадаад, дотоодод танигдсан зохиолчдод олгох “Д.Содномдоржийн шагнал”-ыг анхлан санаачилж түүний дүртэй тэмдэг, үнэмлэхийг бий болгожээ.