Германы нийслэл орон нутгийн цагаар даваа гаригийн орой ачааны машинтай этгээд Берлин хотын худалдааны захад дайран орж, олон хүний амийг хөнөөжээ. Ослын улмаас 12 хүн амиа алдаж, 48 хүн хүнд бэртжээ. Осол Берлин хотын баруун хэсэгт орших Брайтшайдплац талбайн орчимд болсон байна. Машин 60 км/цаг орчим хурдтай явж байжээ.
Албаны хүмүүс уг ослыг террорист халдлага гэж дүгнэж буй талаар тус улсын тагнуулын албанаас мэдэгджээ. Гэмт этгээдийг баривчлан саатуулсан, ачааны машин нь Польшийн улсын дугаартай байсныг Германы Цагдаагийн газрын хэвлэлийн төлөөлөгч Керстин Цьесмар хэлсэн байна. Ган төмөр тээвэрлэж явсан машин хулгайлагдсан байж болзошгүй талаар тухайн ачааны машиныг хариуцдаг оператор компанийн эзэн Арьел Цуравски мэдээлэл өгчээ. Цуравскийн үеэл уг машины жолоочоор ажилладаг боловч осол болох үед жолоочийн рулийн ард огт өөр хүн сууж байжээ. Гэрчүүдийн яриагаар ачааны машин хурдаа сааруулалгүйгээр явган хүний замыг дайрч, шууд худалдааны захын шилэн цонхыг дайрч орсон гэнэ.
