НЭМЭЛТ:22:00 ЦАГ
-ЗУРГААДУГААР ИХ ХУРЛААР ДҮРМИЙН ТӨСЛИЙГ НИЙТЭД НЬ БАТАЛЖ АМЖСАНГҮЙ-
АН-ын зургаадугаар их хурал өндөрлөлөө. Хоёр өдөр үргэлжилсэн тус хурлаар намын даргын илтгэл, АН-ын дүрмийн шинэчлэл зэрэг асуудлыг хэлэлцэхээр болсон.
Гэвч АН-ын зургаадугаар их хурал хоёр өдрийн хугацаанд дүрмийн төслөө нийтэд нь баталж амжсангүй. Тухайлбал Шинэчилсэн дүрмийн төслийнхөө 1-4 бүлгээ баталсан байна. Харин дүрмийн төслийн шинэчлэлийн үргэлжлэлийг 2017 оны хоёрдугаар сарын 12-ны өдөр болох АН-ын Долдугаар их хурлаараа үргэлжлүүлж батлахаар болж, энэ удаагийн их хурлаасаа долдугаар их хуралд бэлтгэх ажлын хэсэг байгуулаад өндөрлөсөн байна.
НЭМЭЛТ: 21:00 ЦАГ
-7-Р ИХ ХУРЛАА ХОЁРДУГААР САРЫН 12-НД ТОВЛОВ-
АН-ын Их хурал үргэлжилж байна. Хурлаар намын долдугаар Их хурлыг хоёрдугаар сарын 12-нд хийхээр шийджээ. Энэ удаагийн хуралд 1210 төлөөлөгч оролцсон бол долдугаар хурлаар төлөөлөгч нарын тоог нэмэгдүүлэх аж.
НЭМЭЛТ: 20:40 ЦАГ
-АН-ЫН ДАРГЫГ НЭГДҮГЭЭР САРЫН 29 НЫ ӨДӨР БҮХ ГИШҮҮДИЙН САНАЛААР ТОДРУУЛНА-
Ардчилсан намын Их хурлаар үдээс хойш дүрмийн хэлэлцүүлгийг хийсэн. Хэлэлцүүлгийн үеэр төлөөлөгчдийн зүгээс санал, шүүмжлэлүүд хэлсэн байна. Харин одоо дүрмийн хэлэлцүүлгийг зогсоож АН-ын даргын марафоныг ярилцаж байгаа аж. АН даргаа сонгохдоо сунгаа явуулна гэдэг тохироонд хүрээд буй. Тиймээс хурлаар АН-ын даргыг нэгдүгээр сарын 29-нд орон даяар бүх гишүүдийн дунд сонгууль явуулж сонгохоор болжээ. Намын даргад нэр дэвших нь нээлттэй бөгөөд одоогоор дөрвөн хүн нэр дэвшихээ зарлаад буй юм. Мөн намд элсээд 10 жил болсон хүн намын даргад нэр дэвшүүлнэ гэх саналыг төлөөлөгч нар хэлэлцэж байгаа аж.