Бөх сонирхогчид, үзэгчид энэ сард лав уйдахгүй нь ээ. Бараг долоон хоног бүр томоохон барилдаан бөхийн өргөөнд болох юм. Эхнийх нь 12-нд “Хантайшир” дэвжээ байгуулагдсаны 15 жилийн ойд зориулсан улс, аймгийн алдар цолтой 224 бөхийн барилдаантай.
Уг барилдаанаа угтах тус дэвжээнийхэн нэрэмжит барилдааны уламжлалд шинэ хуудас нээж Эх нялхсын төв эмнэлэгт онц шаардлагатай тоног төхөөрөмжүүд бэлэглэсэн байна
“Хантайшир” -ын нэрэмжит барилдааны дараа 20-нд Үндэсний спортын ууган гавьяат мастер, дархан аварга Б.Түвдэндоржийн мэндэлсний 100 жилийн ойд зориулсан бас нэг том барилдаан болох бол сарын сүүлчээр буюу 27-нд Зууны манлай Монгол бөх, дэлхийн бөхийн од, дархан аварга Х.Баянмөнхийн нэрэмжит 224 бөхийн барилдааныг үзэх нь ээ.