Монгол Улсын Аюулгүй байдлыг хангах чиг үүрэг бүхий байгууллагуудын дунд жил бүр уламжлал болон зохион байгуулагддаг “Мэргэн буудагч-2016” тэмцээн Зэвсэгт хүчний 311 дугаар ангийн Хужирбулан буудлагын талбайд 10 дахь жилдээ амжилттай болж өнгөрлөө.
Энэхүү тэмцээнд Зэвсэгт хүчин, ТЕГ, Эрүүгийн цагдаагийн газар, ХХЕГ, ОБЕГ, Төрийн тусгай хамгаалалтын газар болон Сүлд телевиз зэрэг 29 байгууллагын 35 баг тамирчид гурван төрлийн буугаар таван номинацад өрсөлджээ. Тамирчид мэргэжлээрээ өрсөлдөөд зогсохгүй гранат шидэлт, туухай өргөлт, олс таталт зэрэг авхаалж самбаа, эр зориг, хурд хүч шалгасан тэмцээнүүдэд ч өрсөлдсөн байна. Тэмцээний нэгдсэн дүнгээр тэргүүн байрт Зэвсэгт хүчний 120 дугаар ангийн баг тамирчид шалгарсан бол удаахь байруудыг Зэвсэгт хүчний 311 дүгээр ангийн баг тамирчид, Зэвсэгт хүчний 310 дугаар ангийн тамирчид эзэлжээ. Цэргийн нэгдсэн сургуулийн Галын бэлтгэлийн тэнхимийн дарга асан С.Цэрэнсодномын нэрэмжит энэхүү тэмцээн нь хүчний байгууллагынхны хүсэн хүлээдэг тэмцээний нэг бөгөөд жилээс жилд цар хүрээгээ тэлсээр байна.