2014 оны сүүлээр манай сүлжээнээс 500 сая хэрэглэгчийн мэдээлэл хулгайд алдагдсан байна гэж АНУ-ын мэдээлэл технологийн “Yahoo” компани мэдэгдэв.
“Дэлхий даяарх хэрэглэгчдийн нэрс, цахим шуудангийн хаяг, утасны дугаар, төрсөн огноо болон хувийн бусад мэдээллийг хулгайлсан байна. Гэхдээ хэрэглэгчдийн зээлийн карт, банкны данс зэрэг мэдээлэл алдагдаагүй” гэж компани мэдэгдэлдээ дурджээ.
Харин ямар улсын иргэдийн мэдээлэл алдагдсан тухайд компани тайлбар өгсөнгүй. Энэ цахим гэмт хэрэгт өртөж хохирсон болон 2014 оноос хойш нууц кодоо солиогүй хүмүүсийг яаралтай нууц кодоо солихыг “Yahoo”зөвлөжээ.
“Yahoo” компани энэ халдлагыг төрөөс дэмжлэг хүлээсэн хакерууд үйлдсэн гэж үзэж байгаа бөгөөд уг асуудлаар хууль сахиулах байгууллагатай хамтран ажиллаж байна гэж мэдэгдэв.
Харин шинжээчид үүнийг хамгийн том кибер халдлага гэж үзэж байна.