АН-ын дарга Э.Бат-Үүл өнөөдөр буюу есдүгээр сарын 12-нд хэвлэлийнхэнд мэдээлэл өглөө.
Тэрээр “Намайг С.Зоригийг хөнөөсөн, бүрэлгэсэн хэрэгт хууль бусаар дахин сэжигтнээр татлаа. Маш ноцтой, маш их эргэлзээ төрүүлсэн үйл явц өрнөж байна. Хуулийн дагуу явж байгаа зүйл алга. Өнөөдөр өгч байгаа мэдээллийг тасалдуулах вий гэдэг үүднээс би зориуд цаг үеийн асуудлаар мэдээлэл хийнэ гэж та бүхэнд зар хүргэсэн юм. 1998 онд энэ хэрэг гарсан. Тухайлбал, намайг тэр өдрийн орой гэртэй байх үед Нийслэлийн цагдаагийн дарга Ганболд “таныг хамгаалтанд авч байна” гэж хэлээд хэрэг болсон газар дагуулж очсон. Тэнд очиход үнэхээр олон хүн байсан. Хэргийн газрыг хамгаалтанд аваагүй байсанд нь би их гайхсан. Тэгээд тэнд байж байтал Ц.Элбэгдорж орж ирсэн юм. Хэргийн газраас Ц.Элбэгдоржтой цуг гарч явсан. Гарч явахдаа малгайгаа мартаад явсан юм. Хэргийн дараа надаас гэрчийн мэдүүлэг авсан. Тэр үед хэргийн газар малгайгаа мартсан нь шүүхээр тогтоогдсон гэж шийдвэрлэсэн. Шүүх хяналтын байгууллага тэр үеэс хойш дахиж мэдүүлэг аваагүй. Гэтэл 2000 оны УИХ-ын сонгуулийн өмнө цагдаагийн байгууллагаас дахиж дуудсан. Надаас “хэргийн газарт очихдоо өмссөн малгай чинь байна уу” гэсэн. Тэгээд малгайгаа мөрдөн байцаагчид аваачиж өгсөн. Гэтэл энэ малгай хэргийн газраас олдсон тул таныг сэжигтнээр татаж байна гэсэн. Өөрөөр хэлбэл, малгайгаа мартсан гэсэн нь мөрдөн байцаалтын дүн гарчихсан хэрнээ хоёр жилийн дараа дахин дуудаж надаас малгай асууж байгаад авсан. Яг сонгуулийн өмнө. Энэ хэрэгтэй холбоотойгоор улс төрийн зохин байгууллалтай ажил явагдсан. Маш идэвхтэй. Түүний нэг жишээ нь миний нэр төрийг гутаан доромжилсон мэдээлэл сонин, хэвлэлээр их явсан. Та бүгд мэдэж байгаа байх. Ийм аргаар 2000 оны улс төрийн сонгуульт ажил явагдсан. Энэ хэрэг гарсны дараа улстөржүүлж болохгүй шүү гэдэг саналыг би анх гаргаж байсан. Учир нь хэргийн ул мөр бүдгэрэнэ. Энэ хэргийг улстөржүүлэх юм бол эзэн нь олдохгүй аюултай. Тэр үед хүмүүс миний үгийг л сонсож байсан. Хууль бусаар С.Зоригийг зэрлэгээр хөнөөсөн, бүрэлгэсэн хэрэгт дахин намайг яллагдагчаар татлаа. Сонгуулийн дараагаар намайг С.Зоригийг алсан биш алж байхад нь хажууд нь байсан гэсэн мэдээлэл гаргах болсон. Үүнийг шалгуулахаар Прокурорт хандсан боловч шалгаж өгөхгүй байгаа. Хүний амь нас хөнөөсөн онц ноцтой гэмт хэрэгт холбогдуулан намайг гүжирдсэн. Өнгөрсөн тав дахь өдөр энэ хэрэг болсоноос хойш анх удаа надаас хурууны хээ, цусны шинжилгээг авсан. Харьцуулсан шинжилгээ хийнэ гэсэн. Яллагдагчаар татна гэдэг чинь тодорхой нотлох баримттай байж байж татдаг. Гэтэл яллагдагчаар татсан хойноо нотлох баримт хайгаад байна. С.Зоригийг хөнөөсөн хэргийг илрүүлэхийг үнэхээр их хүсч байна. Намайг яллагдагчаар татаж байгаа бол хуулийн дагуу л хий. Би дуудсан цагт нь очдог. Эрүүгийн хууль болон Эрүүгийн байцаан шийтгэх хуулийн дагуу л ажлаа явуулТэгээд Мөрдөн байцаах газраас энэ хэргийг нууц явуулахаар болсон. Би энэ шийдвэртэй санал нийлээгүй. Эрүүгийн байцаан шийтгэх хуулинд хууль бусаар байцаан шийтгэх ажиллагаа явуулах гэж байгаа бол би мэдүүлэг өгөхгүй байх эрхтэй. Миний хувьд энэ хэргийг анхнаасаа илэрхүүлэхийн төлөө явж ирсэн. Миний бүх хүсэл зориг байгаа. Он жил өнгөрөх тус илүү хүсэх болсон. Яагаад гэвэл хамгийн их хэлмэгдэж хохирч байгаа хүн нь би. Тийм учраас нэр төрөө сэргээхийг их хүсэж байна” гэлээ.