Улсын Их хурал дахь МАН-ын бүлгийн дарга Д.Хаянхярваа өчигдрийн УИХ-ын чуулган дээр “Та нарын нураасан юмыг чинь бид босгох гээд байна. Манай нам бол нэгдмэл нам. Чуулган дээр бид нэг шийдлээр саналаа хураадаг. Та нар үүн дээр санаа зовох хэрэггүй. 2,5 сая төгрөгөөс дээш цалинтай айл аймгийн төв, суманд хэд байдаг юм бэ? Засгийн газрынхан боломжгүй бодлого оруулж ирсэн нь үнэн. Гэхдээ бид та нар шиг сонгуулиас сонгуулийн хооронд амьдармааргүй байна. Магадгүй үүнээс ч чанга бодлого явуулмаар байна. Он гараад дахиад ч төсвийн тодотгол хийж магадгүй. Та нарын сайн гэсэн бүхнийг нааш нь төсөв рүүгээ авлаа. Гэтэл та нар эсрэгээр ярьж байна. Галсансүхийн нэг шүлэг байдаг. Бурхан чиний сайн гэсэн бүхнийг чинь хийлээ. Хаана байна тэр сайхан юм чинь. Эцэст нь бурхан чамд хэлэх зөвлөгөө байна. Бурхан чи битгий хуцаа гэж. Яг үүнтэй адил Засгийн газрынхан чинь үнэнээ хэлээд ийм төсөл оруулж ирж байгаа юм. Ингэж байж бид нар богино хугацаанд хямралаас гарна” гэлээ.
УИХ-ын гишүүн ийн хэлэхдээ бурхан руу дайрч, ард түмнийхээ өмнө ёс суртахуунгүй үгсийг амны зоргоор урсгав. Яруу найрагчийн бичсэн шүлгийг улс төрийн өндөр алба хашиж байгаа эрхэм ингэж иш татаж хэлэхдээ Ардчилсан нам руу хандан хэлэх бус, ард түмнээ давхар доромжилчихож байгаа юм биш үү. УИХ-ын гишүүн хэлсэн үгэндээ хариуцлага хүлээдэг хууль манайд байхгүй юм чинь юу ч гээд хэлчихэд яадаг юм гэж хандав уу. Ард түмнийхээ халаасыг хоосолж, бүсээ чангал гэж хэлчихээд, дээр нь ингэж эрээ цээргүй УИХ-ын танхимд “Бурхан чи хуц, солиор” гэх мэт чулуудаж, түүнд нь гишүүд баяр хүргэн алга ташаад байвал манай улсын ирээдүй юу болох вэ. УИХ-ын танхимд хэлсэн үгэнд хуулиар хариуцлага хүлээлгэхгүй ч бурхан руу ингэж дайрвал Бурхан шийтгэдэг эсэхийг хэн мэдлээ.