Нүд улайн, нүдэнд юм орж торж арган, салхинд явахад нулимс гоожин, нүд загатнан, хурц гэрэлд гялбан, ядраад байвал хэнд ч хэцүү санагдана. Хэрвээ танд дээрх шинж тэмдгүүд илэрч байвал дараахь арга хэмжээг авч, өөрийнхөө мэлмийг хамгаалаарай. Мөн нүдний мэргэжлийн эмчид хандаж зөвлөгөө авах хэрэгтэй.
Нүд хуурайшуулах хүчин зүйлүүдээс аль болох зайлсхийх, хиймэл нулимсыг эмчийн заавраар дусааж нүдээ чийгшүүлэн, өрөө тасалгааны температурыг багасгах хэрэгтэй. Учир нь хэт дулаан хэмд байхад нулимсны давхаргын ууршилт түргэн болдог байна. Тиймээс гэр болон ажлын өрөөгөө чийгшүүлэн, нарны хэт ягаан туяа, компьютерийн дэлгэц монитороос хамгаалах хамгаалалтын шил зүүхэд гэмгүй. Мөн нүдээ тогтмол амрааж, нүдний дасгал хийж заншвал сайн. Амьдралын зөв хэвшлийг өөртөө төлөвшүүлж, өвчин эмгэгээс урьдчилан сэргийлж, хэрвээ өвдсөн бол хүндрэл гарахаас нь өмнө эмчид хандан эмчлүүлэх хэрэгтэй.
Нойргүйдэл, ядаргаанаас болоод хүний нүдний доод зовхи хөхрөн харлах, хавагнах, улмаар суларч үрчлээтэх нь элбэг. Энэ нь хүний нүүрний арьсны хамгийн нимгэн, эмзэг арьстай хэсэг ба гоо сайханд ч нөлөөлдөг. Тиймээс гэрийн нөхцөлд гарын доорх бүтээгдэхүүнээр доод зовхио арчлах энгийн хялбар аргыг хүргэе. Бага зэргийн хүнсний сода, бүлээн ус байхад л хангалттай. Нэг цайны халбага хүнсний содыг 150 мл халуун бүлээн ус эсвэл байхуу цайнд сайтар хутгаж уусгаад хөвөнд шингээж нүдний доод зовхин дээр бүлээн жин тавих маягаар 15 минут болгоод бүлээн усаар угаагаарай. Үр дүнг нь тун удахгүй мэдрэх болно. Энэхүү аргыг долоо хоногт 2-3 удаа орой унтахаасаа өмнө хэрэгжүүлбэл үр дүнтэй. Эрт унтаж амрахыг хичээгээрэй. Ингэснээр таны зовхины хөх өнгийг арилгаж, зовхи суларч унжихаас сэргийлж, арьсыг чангалдаг.