Ирэх наймдугаар сарын 5-нд Бразил улсын Рио дү Жанейро хотноо хүн төрөхлхтөний их баяр цэнгэл олимпийн их наадам эхлэх билээ. Энэ удаагийн 31 дэх зуны олимпод Монгол Улс түүхэндээ анх удаа хамгийн олон буюу 50 тамирчнаа илгээж байна. Өнөөдөр төрийн өндөрлөгүүд, спортын салбарынхан Чингисийн талбайд үдэн гаргах ёслол хийлээ.
Үдэлтийн ёслолд Монгол Улсын Ерөнхийлөгч Ц.Элбэгдорж, Монгол Улсын Ерөнхий сайд Ж.Эрдэнэбат, Монголын байт харвааны холбооны ерөнхийлөгч П.Цагаан, Эрүүл мэнд, спортын сайд С.Ламбаа, ЭМСЯ-ны Төрийн нарийн бичгийн дарга А.Эрдэнэтуяа, УИХ-ын гишүүн, 1988, 1992, 2000 олимпийн наадамд оролцож, Монгол Улсын багийн тугчаар гурван удаа сонгогдож байсан Б.Бат-Эрдэнэ, Үндэсний олимпийн хорооны ерөнхийлөгч Д.Загдсүрэн, Монголын багийн ахлагч Ж.Хатанбаатар, хотын Захирагч С.Батболд нар оролцлоо.
Олимпийн наадмын есөн төрөлд 42 тамирчин, Паралимпийн таван төрөлд найман тамирчин оролцохоор болоод байгаа билээ.
