БНСУ-ын Ерөнхийлөгч Эрхэмсэг хатагтай Ерөнхийлөгч Пак Гын Хэ Улаанбаатар хотноо зохион байгуулагдсан АСЕМ-ийн 11 дэх удаагийн дээд түвшний уулзалтад оролцоод долдугаар сарын 17-18-ны өдрүүдэд Монгол Улсад албан ёсны айлчлал хийсэн билээ. Ийнхүү БНСУ-ын Ерөнхийлөгч Пак Гын Хэгийн монгол дахь албан ёсны айлчлал өнөөдрөөр дуусч байна.
Солонгосын Ерөнхийлөгчийг Монгол Улсын Гадаад Хэргийн сайд Л.Пүрэвсүрэн болон албаны бусад хүмүүс гаргаж өглөө.Энэ үеэр хүндэт харуул жагсаж ёслол төгөлдөр үдэлт хийв.
ХатагтайПак Гын Хэ “Чингис хаан” олон улсын нисэх буудлаас онцгой үүргийн онгоцоор нутаг буцлаа.
БНСУ-ын Ерөнхийлөгчийн Монгол Улсад хийж буй албан ёсны айлчлалын хүрээнд хоёр тал хамтын ажиллагааны 20 гаруй баримт бичигт гарын үсэг зурсан байна.Тухайлбал БНСУ-ын Эдийн засгийн хамтын ажиллагааны сан /EDCF/-гийн 19.6 сая ам.долларын хөнгөлөлттэй зээлээр “Ухаалаг боловсрол” төслийг хэрэгжүүлэх зээлийн хэлэлцээрт гарын үсэг зурлаа. Төслийн хүрээнд Монгол Улсын ерөнхий боловсролын сургуулиудад смарт анги байгуулах, сургалтын арга зүйг сайжруулах, орчин үеийн смарт тоног төхөөрөмж дээр хичээл заах, багш нарыг чадваржуулах зэрэг олон талын үр дүн гэлээ.
Мөн EDCF сангийн 25 сая ам.долларын зэээлээр “Улс, хот хоорондын нийтийн тээврийн үйлчилгээнд дэмжлэг үзүүлэх төсөл”-ийн 2 дугаар шатны зээлийн хэлэлцээрт гарын үсэг зурав. Энэхүү төслийн хүрээнд Монгол Улс хот хоорондын тээвэрт зориулж том оврын 200 автобус авч ашиглах юм. Төсөл хэрэгжсэнээр манай хот хоорондын тээврийн үйлчилгээ сайжрахаас гадна автобусны засвар үйлчилгээ, тээврийн чиглэлийг боловсронгуй болгох зэрэг чиглэлд дэвшил гарна хэмээн Гадаад хэргийн яам мэдээллээ.