Тулгар төрийн 2225, Их Монгол Улсын 810, Ардын хувьсгалын 95 жилийн ойн аймгуудын баяр наадмын түрүүч болох Завхан аймгийн наадам долдугаар сарын 8, 9-нд болж өнгөрчээ.
Завхан аймгийн наадамд улсын гарьд Ш.Жаргалсайхан, өсөх идэр начин Ш.Уламбаяр нарын улс, аймгийн алдар цолтой 256 бөх барилдсан байна. Аймгийн заан Т.Бэгзсүрэн түрүүлж, аймгийн арслан цол хүртсэн бол аймгийн харцага Э.Баасандорж үзүүрлэн, аймгийн заан цол хүртжээ. Их шөвөгт сумын заан Д.Батхүрэл, Г.Баярбат нар үлдэж, аймгийн начин цол хүртсэн байна.
Харин хурдан хүлгүүдийн уралдаан азарганы уралдаанаар эхэлж соёолон, хязаалан, шүдлэн, даага, эрлийз ( дээд, дунд, даага ), их насны хүлгийн уралдааны дурдан тоосоор өндөрлөлөө. Завхан аймгийн Тосонцэнгэл сумын уугуул алдарт уяач Лхагвасүрэнгийн сойсон хар азарга түрүүлж,Завхан аймгийн Дөрвөлжин сумын уугуул Б.Бат-Эрдэнийн “Хар саарал” аман хүзүүдэж, Завхан аймгийн Яруу сумын уугуул Ч.Батболдын “Хонгор”,Эрдэнхайрхан сумын Лодонишийн “Хүрэн”, Завхан аймгийн Тосонцэнгэл сумын уугуул Т.Болдын “Шарга” тус тус хурдалж айрагдсан байна. Түүнчлэн төрийн тахилгат Отгонтэнгэр хайрханыг тахих ёслол долдугаар сарын 22-нд болох ажээ.
