“Ухаалаг
Улаанбаатар” хөтөлбөрийн хүрээнд Нийслэлийн Мэдээллийн технологийн
газар нь “Улаанбаатар хотыг утасгүй интернетжүүлэх” төслийг хэрэгжүүлж
буй. Энэ төслийн хүрээнд нийслэлийн 9 дүүргийн 151 хороо, Багахангай,
Сонгинохайрхан, Налайх, Багануур дүүргүүдийн Засаг даргын Тамгын газрын
байр зэрэг нийт 155 байршилд утасгүй интернетийн бүс байгуулж, иргэдийг
үнэ төлбөргүй интернетийн сүлжээгээр хангах зорилготой юм.
Төслийн эхний ээлжинд Хан-Уул,
Сонгинохайрхан, Сүхбаатар, Баянзүрх дүүргүүдийн зарим хороонд утасгүй
интернетийн бүс бий болгон туршилтаар ажиллуулж байгаа бөгөөд 2016 оны
6-р сард дээрх 155 цэгийг бүрэн хамруулж дуусах юм.
Иргэд өөрийн амьдарч буй хорооны утасгүй интернетийн бүсэд холбогдсоноор төрийн үйлчилгээг түргэн шуурхай авах, мэдээ мэдээллээр хангагдах мөн өөрийн санал хүсэлт, өргөдөл гомдлоо илгээх, зэрэг олон боломж бүрдэх юм.
Иргэн хотын үнэгүй, утасгүй интернетэд
холбогдохын тулд өөрт ойр байрлах хорооны байр орчимд Wifi дэмждэг
төхөөрөмжөө ашиглан “UBWiFi” нэртэй сүлжээнд холбогдон бүртгүүлэх
хэрэгтэй. Хэрэв өмнө нь цахим газар өмчлөл, цахим зуслангийн газар
өмчлөлд бүртгүүлэн хандаж байсан бол тухайн бүртгэлийн мэдээллийг
ашиглан утасгүй интернетэд нэвтрэн орох боломжтой.
Энэ сүлжээнд холбогдсоноор иргэд
Нийслэлийн мэдээ, мэдээллийг цаг алдалгүй авахwww.ulaanbaatar.mn,
Ухаалаг Улаанбаатар хөтөлбөрийн хүрээнд хэрэгжүүлсэн иргэний цахим нэг
цонх www.citizen.ulaanbaatar.mn, газар өмчлөлийн цахим систем,
www.land.ulaanbaatar.mn, иргэдийн оролцоотой Улаанбаатар хотын газрын
зураглалын нэгдсэн сан www.manaikhoroo.mn, өөрийн амьдарч буй хорооныхоо
эрүүл аюулгүй байдлын индексийн талаар мэдээлэл авах
боломжтой www.eabi.ub.gov.mn, нийслэлийн нээлттэй өгөгдлийн
портал www.data.ulaanbaatar.mn, авто тээврийн хэрэгслийн нэгдсэн
системwww.smartcar.mn зэрэг төрийн үйлчилгээний цахим сайтуудад өндөр
хурдтайгаар холбогдож, төрийн үйлчилгээг авахаас гадна интернетийн
орчинд хүссэнээрээ аялах боломжтой юм.
“Улаанбаатар хотыг утасгүй интернетжүүлэх төслийг хэрэгжүүлснээр Улаанбаатар хот дэлхийн өндөр хөгжилтэй хотуудын жишигт хүрсэн Ухаалаг хот болох нэг том алхам юм” гэж Нийслэлийн Мэдээллийн технологийн газраас мэдээллээ.
