Дөрвөн настай хүү нохойд уруулсны улмаас шархаа даалгүй амиа алдсан харамсалтай хэрэг өнгөрсөн гуравдугаар сард гарсан билээ.
Тодруулбал, Сонгинохайрхан дүүргийн 24 дүгээр хорооны Цээлийн задгай гэх газар амьдардаг хүү хашаандаа ганцаараа тоглож байхад нь хажуугийнх нь айлын дундад ази үүлдрийн нохой хашаа даван орж ирж дайран хүзүү, мөр, гэдэснийх нь зүүн хэсэг, гуяыг нь хазаж, ноцтой гэмтэл учруулж, улмаар эмнэлэгт хүргэгдсэн ч шархаа даалгүй нас барсан юм.
Хүүг урсан нохой нь тус хороонд оршин суух 44 настай Э-гийнх байсан бөгөөд тухайн өдөр тэрбээр гэртээ байгаагүй, нохой нь уяагүй, байсан. Тиймээс тухайн нохойны эзэн Э нь эрүүгийн хариуцлага хүлээхээр болсон билээ. Монгол Улсын Эрүүгийн хуулийн тусгай ангийн 201.1 дүгээр зүйлд “Орчиндоо аюул учруулж болох амьтныг зохих хамгаалалтгүй байлгасны улмаас хүний бие махбодийг хөнгөн буюу хүндэвтэр гэмтээсэн бол хөдөлмөрийн хөлсний доод хэмжээг таваас тавь дахин нэмэгдүүлсэнтэй тэнцэх хэмжээний мөнгөөр торгох, эсхүл нэгээс гурван сар хүртэл хугацаагаар баривчлах ял шийтгэнэ. Мөн 201.2-д “Энэ хэргийн улмаас хүний амь нас хохирсон, бусад хүнд хор уршиг учирсан бол гурваас дээш зургаан сар хүртэл хугацаагаар баривчлах, эсхүл таван жил хүртэл хугацаагаар хорих ял шийтгэнэ гэж заасан байдаг. Улмаар дөрвөн настай хүүгийн аминд хүрсэн нохойн эзэнд яллах дүгнэлт үйлдсэн. Ирэх долоо хоногт шүүхэд шилжүүлэхээр болсон гэдгийг эх сурвалж мэдээлсэн юм.