ОХУ-ын воллейболын үндэсний шигшээ багийн тоглогч, хоёр удаагийн Дэлхийн аварга Екатерина Александровна Гамова спортын карьераа дуусгавар болгож буйгаа өчигдөр /05.18/ мэдэгдлээ.
Тэрээр “Намайг тамирчны хувиар өсөн дэвжиж, хөгжихөд тусалсан дасгалжуулагч, шүтэн бишрэгч нартаа баярлалаа. Мөн үргэлж намайг дэмжиж ирсэн гэр бүлийнхэндээ баярлалаа. Өнөөдөр би спортын карьераа дуусгавар болгож байгаагаа мэдэгдэж байна” хэмээснийг Оросын хэвлэл мэдээллийн хэрэгслүүд шууд дамжуулжээ.
Түүнчлэн Екатерина Гамова удахгүй зохиогдох зуны олимпод эрүүл мэндийн шалтгааны улмаас оролцохгүй болсноо мэдэгдсэн юм.
Эдүгээ 36 настай тамирчин бүсгүй хоёр удаагийн олимпийн мөнгөн медаль, хоёр удаагийн Дэлхийн аваргаар шалгарч байснаас гадна 11 удаагийн Үндэсний аварга, дөрвөн удаагийн Оросын цомын эзнээр шалгарч байжээ. Сонирхуулахад, Гамова дэлхийн хамгийн өндөр эмэгтэй тамирчдын нэг бөгөөд 2.2 метр өндөртэй ажээ.