Генерал цолтнуудын уулзалт боллоо

Генерал цол олгож эхэлсний 72 жилийн ойг тэмдэглэн өнгөрүүлэх арга хэмжээний хүрээнд генерал цолтнуудын уулзалт Төрийн ёслол хүндэтгэлийн танхимд боллоо. Уулзалтад үе үеийн генералууд болон Шадар сайд Ц.Оюунбаатар, Монгол Улсын сайд, ЗГХЭГ-ын дарга С.Баярцогт, Ерөнхийлөгчийн Тамгын газрын дарга П.Цагаан нар оролцов.

Монгол Улсын сайд, ЗГХЭГ-ын дарга С.Баярцогт эх орныхоо эрх чөлөө, тусгаар тогтнолыг батлан хамгаалах үйл хэрэгт гарамгай гавьяа байгуулж, Монгол Улсын цэргийн дээд генерал цол хүртсэн генералууд, энд хүрэлцэн ирсэн та бүхэнд энэхүү тэмдэглэлт өдрийн мэндийг хүргэе гэлээ. Мөн Ерөнхий сайд Ч.Сайханбилэгийн мэндчилгээг уламжиллаа.

Засгийн газар улс орныхоо батлан хамгаалах хүчийг бэхжүүлэх, цэрэг, цагдаагийн алба хаагчид энхийг дэмжих ажиллагаад оролцох чадвар боломжийг нэмэгдүүлэх зорилтыг амжилттай хэрэгжүүлж байна гэдгийг Монгол Улсын сайд, ЗГХЭГ-ын дарга С.Баярцогт онцлоод Засгийн газраас УИХ-д өргөн мэдүүлсэн улс орны аюулгүй байдлыг хангах, Зэвсэгт хүчний байгуулалтыг боловсронгуй болгоход чиглэсэн багц хуулийг баталгаажуулж хэрэгжүүлснээр төрийн цэргийн шинэчлэлийн нэгэн шинэ үе шат эхэлнэ гэж үзэж байна. Энэ үйлсэд генералуудын мэдлэг, дадлага туршлага, манлайлал үлэмж ач холбогдолтой гэдгийг тодотголоо.

Мөн тэрээр генералууд, тэдний гэр бүл, үр хүүхэд, хамт олондМонгол Улсын Зэвсэгт хүчний даргалах бүрэлдэхүүнд генерал цол олгож эхэлсний 72 жилийн ойг тохиолдуулан баяр хүргэж, ажлын амжилт, сайн сайхныг ерөөлөө гэж Засгийн газрын Хэвлэл мэдээлэл, олон нийттэй харилцах албанаас мэдээллээ.