УИХ-ын чуулганы нэгдсэн хуралдаанаар Эмнэлгийн тусламж үйлчилгээний тухай болон холбогдох бусад хуулийн төслийн эцсийн хэлэлцүүлгийг хийж, гишүүдийн 67.3 хувийн саналаар дэмжин баталлаа. Мөн Эрүүл мэндийн тусламж үйлчилгээний тухай хуулийн төслийг гишүүдийн 74.5 хувийн саналаар, Төрийн болон орон нутгийн өмчийн тухай хуульд нэмэлт өөрчлөлт оруулах тухай хуулийн төслийг 71.3 хувиар дэмжин, тус тус батлав. УИХ-аас дээрх хуулийг баталснаар эмнэлэг бие даан шийдвэрээ гаргаж, хөгжих бололцоо нь нээгдэж байгаа. Ингэснээр төрийн болон орон нутгийн өмчит мэргэшлийн эмнэлэг, нэгдсэн эмнэлгийн Төлөөлөх удирдах зөвлөлөөс удирдлагыг санал болгон томилох болж байна. Мөн төсөв, цалинтай холбоотой бүх асуудлуудыг эмнэлгийн байгууллага өөрсдөө шийдэх бололцоо бүрдэж байна. Ингээд чуулганы хуралдаан завсарлаж 14.00 цагаас эргэн хуралдана.