Улаанбаатар хотоос гадна хоёр аймагт “Гудамж” төсөл амжилттай хэрэгжиж буй бөгөөд нэг нь Увс аймаг юм. Тус төслийн хүрээнд тус аймагт 10,5 км автозам, явган хүний 14,5 км зам, 2,1 км дугуйн зам баригдаж, гэрэлтүүлэг тавьж, газар дорх инженерийн байгууламжийг засварласан бөгөөд зарим бүтээн байгуулалтын ажилтай нь Ерөнхий сайд Ч.Сайханбилэг танилцлаа.
Тэсийн гол дээр 127 метр урт төмөр бетонон гүүрийг 2,9 тэрбум төгрөгийн өртөгтэй хийж гүйцэтгэсэн, ингэснээр малчид өвөлжөө, хаваржаандаа саадгүй нүүх боломж бүрджээ.
Мөн тус аймагт хэрэгжсэн 1000 айлын орон сууц хөтөлбөрийн хүрээнд 646 айлын шинэ орон сууц барьжээ. 1990-2012 онд 98 айлын орон сууц барьж байсан бол сүүлийн гурван жилд 646 айлын орон сууц барж ашиглалтад орууллаа гэж тус аймгийн удирдлага танилцууллаа.
Хур хогийн цэг байсан газрыг цэвэрлэн иргэдэд хувийн хаусны зориулалтаар 400 айлын жишиг хороолол барих ажил хийгдэж байна. Ингэхдээ нэг стандартаар хаша барьж, цэвэр усны худгийг шийдэж өгчээ.
Тус аймгийн хуучин нисэх буудлыг автовокзал болгон тохижуулах ажлыг ойрын гурван сард хийж гүйцэтгэх боломжтой гэдгийг Зам, тээврийн сайд М.Зоригт иргэдийн асуултад хариулахдаа хэллээ.
Аэро Монголиа, Хүннү эйр зэрэг авиа компаниуд агаарын шууд нислэгийг долоо хоногийн зургаан өдөрт хйих болсноор жуулчдын цагийн зохицуулалт, аяллын хугацааг төлөвлөхөд таатай орчин бүрдэж байгааг жуулчлалын компаниуд хэлж байсан юм. Улаанбаатараас Ходын чиглэлд том оврын онгоц нислэг үйлдэж эхэлсэнд тэд талархлаа илэрхийллээ.
Ерөнхий сайд Ч.Сайханбилэг Увс аймагт ажиллах үеэрээ тус аймгийн иргэдтэй уулзалт хийж, тэдний сонирхсон асуултад хариуллаа.
Ерөнхий сайд өнөөдөр Баян-Өлгий аймагт ажиллана гэж Засгийн газрын Хэвлэл мэдээлэл, олон нийттэй харилцах албанаас мэдээллээ.
