Санжийн Пүрэв хэмээх хүүрнэл үгийн их туурвилчийн бүтээлийг хүүхэд ахуй наснаасаа уншиж ухааны сүв нээгдсэн хүн олон бий. Монгол Улсын Соёлын гавьяат зүтгэлтэн, Д.Нацагдоржийн нэрэмжит шагналт зохиолч С.Пүрэв “Эх газрын чулуу”, “Эргүүлэг”, “Цагийн урсгал”, “Усны гудамж”, “Алаг заяа” зэрэг арваад роман туурвиж олны хүртээл болгосон эрхэм. Бичгийн их хүмүүний “Уулын намар”, “Их усны хаялга”, “Гурван говийн зэрэглээ”, “Сүүдэр догшрох цаг”, “Айлын бүсгүйг мартахгүй”, “Гэрэлт маргаашаа угтахсан”, “Ухаарч амьдрах орчлон”, “Тэнгэрийн сум зүрхэнд тусдаг”, “Тоглоомын тойрог” зэрэг уянгын олон арван туужийг уншигчид мэднэ. “Азын цэнхэр уул”, “Усаа дагаж жаргана”, “Дайны жилийн хүүхэд нас”, “Гандиймаа нутагтаа бий” зэрэг зуу зуугаар тоологдох өгүүллэг бичсэнээс зарим бүтээлүүд нь орос, хятад, англи, франц, испани, вьетнам, япон зэрэг хэлнээ орчуулагдсан байдаг.
Түүний “Суварган цэнхэр уул”, “Загийн алим”, “Мартагдсан дууль”, “Салж чадашгүй хайр”, “Тэнгэр мэднэ” бүрэн хэмжээний уран сайхны кино, “Хувьсгалын өлгий нутаг”, “Илч гэрлийн эзэн”, “Нарны орон Алтай” баримтат кинонууд үзэгч олны талархал хүлээдэг. Харамсалтай нь, Говь-Алтайн Дарвийн уугуул Санжийн Пүрэв зохиолч “сахарын” хэмээх аюулт өвчинд нэрвэгдээд бие лагшин нь ихэд чилээрхжээ. Эмчилгээний зардалд нь зуу орчим сая төгрөг шаардлагатай гэж ойр дотныхон нь ярьж байна. Монголчууд бид “Тэнхлүүн явахад тэмээгээр тусалснаас тэвдэж явахад тэвнээр тусал” гэсэн сайхан сэтгэлтэй улс. Хүүрнэл үгийн их туурвилчийн ном бүтээлийг үр хүүхдийнх нь 96366056, 99040249 дугаарын утсаар холбогдон авч болохоос гадна “ХААН” банкны 5034402911, Төрийн банкны 10320015092 тоот дансанд сэтгэлийн хандиваа өргөж болох аж. “Олны хүч оломгүй далай” гэдэгчлэн монгол түмнийхээ сэтгэлийн их дэмээр Санжийн Пүрэв баавай минь аюулт өвчнөөс ангижирвал уран бүтээлийн их онгодоор ач юуг нь хариулах сэтгэлийн гэрэлтэй нэгэн билээ л.