Саяхан болж өнгөрсөн олон улсын
эмэгтэйчүүдийн эрхийг хамгаалах өдрөөр “Take Off” хамтлаг тоглолтоо хийсэн юм. Одоогоос
12 жилийн өмнө байгуулагдсан тус хамтлагийн залуус уран бүтээл дээрээ ажиллаад тун
завгүй байгаа гэнэ. Тэднийг Эрдэнэт, Дарханд очиж тоглохооос нь өмнөхөн тус хамтлагийн
ахлагч Э.Сүхжаргалтай ярилцсаныг сонирхуулъя.
-Хэдхэн хоногийн өмнө буюу гуравдугаар
сарын 8-ны өдөр танай хамтлаг тоглолтоо хийсэн. Тоглолт ямар болов?
-Юуны өмнө “Өдрийн сонин”-ы уншигчдадаа
энэ өдрийн мэндийг хүргэе. Гуравдугаар сарын 8-ны өдөр “Take Off” хамтлаг маань
“Зүрхний” нэртэй шоу тоглолтоо “Crocus”-д маш амжилттай зохион байгууллаа. Энэ бол
манай хамтлагийн найм дахь тоглолт. Хамтлаг маань 2004 онд байгуулагдсанаасаа хойш
уран бүтээлээ туурвисаар байна.
-Энэ удаад үзэгчдийнхээ сонорыг
ямар дуугаар мялаав?
-“Надаас өөр хэнд ч ирээгүй дурлал”
киноны саунд трейкийг дуулсан. Түүнийгээ толилууллаа. Нийтдээ 26 дуу дуулсан. Хамтлагийн
сор болсон “Гүнж”,”Буцаад хоёулаа”, “Хэзээ ч мартахгүй” бүтээлээрээ үзэгчдийнхээ
сонорыг мялаалаа. Мөн шинэ дуунуудаасаа ч дуулсан.
-Хамтлагаа яагаад “Take Off” гэж
нэрлэсэн юм бэ?
-Энэ нэрийг бид хоорондоо ярилцаж
байгаад өгсөн. Урьд нь “Аялгуу” гэдэг нэртэй, шөнийн клубуудээр англи дуу дуулдаг
залуучууд байлаа. 2004 онд албан ёсоор “Take Off” гэдэг нэрийг өгсөн. 2003 онд манайх
UB Palace-ийн дэргэдэх хамтлаг байсан. UB Palace-ийн захирал Баяр ах маань “Аялгуу”
гэдэг нэрийг солих санал тавиад энэ нь ардын цөөхүүл хамтлагийн нэр шиг сонсогдож
байна гэсэн. Цоглог, залуу хүмүүсийн эрч хүчийг харуулсан нэр өгөхийг санал болгоод
бид хоорондоо ярилцаад шинэ өнгө төрхтэйгөөр уран бүтээлээ туурвих гэж байгаа тул
нэрээ сольсон. Эхэндээ “Take Off” гэдэг чинь юу гэсэн үг вэ гэдэг байсан бол хэсэг
хугацааны дараа буюу 2004 онд уран бүтээлээ туурвиад явж байхдаа харин ч маш их
тохирсон нэр юм шиг санагдсан шүү. Ер нь бол “Take Off” гэдэг нь газраас тасрах,
хөндийрөх, гэрэл унтраах гээд олон утгатай үг л дээ. Бид бол монголчлоод дэвжин
дээшлэх гэж тайлбарладаг.
-Анх ямар дуугаар уран бүтээлээ
эхэлсэн бэ?
-“Boyz II Man” хамтлагийн “Song
For A Mama”, “My Love” “Backstreet Boys”, “Bee Gees” хамтлагийн “How Deep Is
Your Love” зэрэг дуунуудыг дуулдаг байлаа. Ер нь барууны хамтлагуудын дуунуудаас
дуулж эхэлсэн. “Аялгуу” гэдэг нэртэй байхдаа МУГЖ дуучин Т.Ариунаагийн “Оюутан нас
аялгуу” дууг “Гурван охин” хамтлагтай хамтран дуулсныг үзэгчид маань сайн мэднэ.
-Тухайн үед барууны хамтлагуудын
дууг дуулахад үзэгчид яаж хүлээж авсан бэ?
-Бид олон хоолой салгаж, акапель
гэдэг л дээ, дуулдаг байлаа. Англи дуу дуулахад үзэгчид маш сонин хүлээж авдаг байсан.
UB Palace-ийн “Laser Land” клубт дуулна. “Let it Be” гэж баар байсан тэнд бас дуулдаг
байлаа. Тухайн үед амьд хөгжмийн хамтлагууд нэг их байгаагүй. Биднийг сонсох гэж,
англи дуу, хэллэгийг нь сонсох гэж хүмүүс их ирнэ. Тэр үед хэлний төвүүдийн захирлууд
сурагчдадаа “Тэр англиар дуулдаг хамтлагийг очиж сонс” гэж хэлдэг байсан гэсэн.
Саяхан нэг таньдаг эгч маань надад энэ тухай ярьсан.
-2004 онд хамтлагаа байгуулсан гэж
ярилаа. Тухайн үед “Камертон” хамтлаг нэлээд нэрд гарч байсан үе л дээ.
-Boy band-үүд уран бүтээлээ туурвихаа
болиод зогсонги байдалд орсон байсан үе гэж болно. “Камертон” 2005 оноос хойш нэг
хэсэг чимээгүй болсон. Яг тэр үед boy band-үүд зогсонги байдалд орсон байхад бид
уран бүтээлээ туурвисаар байсан. 2004-2009 он хүртэл идэвхтэй ажилласан.
-Та Англид сурч, ажиллаж байгаад
ирсэн. Тэнд байхдаа барууны хамтлагууд ямар түвшинд байгааг өөрөө харсан байх. Энэ
нь танай хамтлагийн уран бүтээлд ч нөлөөлсөн байх?
-2009 онд Англи яваад гурван жил
гаруй болсон. Залуудаа юм үзэж аливаа зүйлийг өөр өнцгөөс харъя гэсэн бодолтойгоор
явсан. Манай хамтлагийг тарсан гэсэн яриа гарсан байсан. Бид тараагүй. Би ирэнгүүтээ
уран бүтээлийнхээ ажилд орсон. Гадаадад байхдаа маш олон тоглолт үзсэн. Урлаг гэдэг
бол хүн залуу насандаа хийдэг ажил л даа. Тэр дундаа эстрад, поп урлаг. Би Англид
байхдаа “Backstreet Boys”, Бритни Спирс гээд дэлхийд нэртэй олон хамтлаг уран бүтээлчдийн
тоглолтыг үзэж харьцуулах юмтай болсон. Түүнээс сурах юм маш их байсан. Үзсэн зүйлсээ
ирээд хамтлагийнхаа уран бүтээлд тусгахыг хичээсэн.
-Харьцуулах юмтай болсон гэж та
сая хэллээ. Ер нь гадаадын хамтлагуудыг манайхтай харьцуулахад ямар санагдав?
-Ерөнхийдөө бол манайх гайгүй. Монголын
шоу бизнес, тоглолтууд сүүлийн үед өндөр хэмжээнд хүрсэн. Барууны хамтлагуудын тоглолтуудаас
нэг их дутахгүй. Баруунд бол тоглолт менежерийн удирдлага дор байдаг бөгөөд нэг
жил, зургаан сарын өмнө бүх юм нь төлөвлөгдчихсөн, тасалбар нь зарагдаад дуусчихсан
байдаг. Манайхан бол нэлээн тулгаж байж хийдэг. Ингээд сурчихсан монгол зан ч гэдэг.
Харьцуулах юм зөндөө бий. Тайз гэхэд л манайд караказ зангиддаг бол тэнд бүх юмыг
гэрлээр LED дэлгэцээр шийдэж байна. Дэлгэц нь өөрөө урлаг болчихсон. Манайд ч
LED-ийг ашиглаад эхэлчихсэн байгаа.
-Танай хамтлаг удахгүй шинэ CD-гээ
гаргах гэж байгаа гэж сонссон?
-Ирэх тавдугаар сард бид шинэ цомгоо
гаргахаар ажиллаж байгаа.
-Хэдхэн хоногийн дараа Эрдэнэт,
Дарханд очиж тоглох гэж байгаа гэсэн?
-Тийм ээ. Энэ сарын 17,18-нд бид
Эрдэнэт Дарханд очиж тоглолтоо хийнэ. Эрдэнэт хотын залуучууд маань биднийг ирж
тоглооч ээ гэсэн. Очоогүй нэлээд удсан. Тиймээс VIP тоглолтыг амьд хөгжимтэй тоглоно.
Ирэх арваннэгдүгээр сард бид Европын орнуудаар тоглолтоо хийхээр төлөвлөчихсөн байна.
Бид хамгийн сүүлд 2009 онд Лондонд тоглолтоо хийж байсан.